సాగు నేల ఆత్మబంధువు
పంటలకే సగర్వ అధికారి
చెలుకల పలుకుల శ్రోత
మొలకల మర్మమెరిగిన జ్ఞాని
చెమటను నమ్మిన నేస్తం
ఆకలి ఔషధ ఆవిష్కర్త
సకల వేదనల సమ్మిళిత
జాతికి తనేగా వెన్నెముక !
కొండంత అప్పుల తిప్పలు
తడిసి మోపెడైన బాకీలు
మిత్తికి సరిపోని రాబడులు
పెట్టుబడులే బహు భారాలు
తలలు నగనట్రా తాకట్టులు
ఆకలిని భరించే అన్నదాతలు !
ఆత్మహత్యలకే
రైతు మొగ్గులు
బలవన్మరణాలే పరిష్కారాలు
అతివృష్టి అనావృష్టి విపత్తులు
గిట్టని గిట్టుబాటు ధరలు
భరతజాతికే తలవంపులు !
కొండంత పెట్టుబడులు
రవ్వంత రాబడి రాసులు
పెట్టుబడి రాబడి అంతరాలు
కొనబోతే కొరివి
విత్తన, ఎరువులు
అమ్మబోతే అడవి ధాన్యకుప్పలు
మృగ్యమైన రుణమాఫీ చేతలు
నైరాశ్యంలో సమస్త
కర్షక లోకులు
ఆహార భద్రతకే పెనుముప్పులు!
ఏటికి ఎదురీదే సాగుధీరులు
తోడవ్వాలి సర్కారు చేతలు
పకపక నవ్వాలి పంటచేలు
వెల్లివిరియాలి నవ్వుల పువ్వులు
భూపుత్రులే కదా అక్షయపాత్రలు
ధరణి ధరించాలి
హరిత వస్త్రాలు!
మధుపాళీ
99497 00037
