ప్రజాశక్తి-శృంగవరపుకోట : శృంగవరపుకోట పట్టణ ప్రజలకు ఆహ్లాదం కరువైందని చెప్పాలి. మండల కేంద్రానికి వివిధ పనుల నిమిత్తం వచ్చిన వారికి కాసేపు సేద తీరేందుకు దశాబ్దాలుగా పట్టణ నడిబొడ్డున దేవి కూడలి పక్కనే ఉన్న గాంధీ పార్కే నిలయం. ఈ పార్కును గత ప్రభుత్వంలో కొంత అభివృద్ధి చేసినప్పటికీ సిమెంట్‌ బెంచీలను పాత వాటిని కొనసాగించారు. దీంతో అవి పూర్తిగా శిథిలావస్థకు చేరాయి. ఇప్పుడున్న మేజర్‌ పంచాయతీ అధికారులు పార్కులో చెట్లను, బెంచీలను పూర్తిగా తొలగించారు. నెలలు గడుస్తున్నా పార్కును అభివృద్ధి చేయడాన్ని విస్మరించారు. పార్కులోకి వెళ్లే దారిని చుట్టుపక్కల వ్యాపారులు ఆక్రమించారు. దీంతో పార్కు అసాంఘిక కార్యకలాపాలకు నిలయంగా మారింది. ఇప్పటికైనా పార్కులో పూలమొక్కలను పెంచి, బెంచీలు, ఆటవస్తువులు ఏర్పాటు చేయాలని ప్రకృతి ప్రేమికులు కోరుతున్నారు.
పార్కును పునరుద్ధరించాలి
ఏదైనా పనిమీద పట్టణానికి వచ్చినప్పుడు మేజర్‌ పంచాయతీకి చెందిన గాంధీ పార్కులో కొంతసేపు సేదదీరేవాడిని. ప్రస్తుతం పార్కు చుట్టూ ఉన్న పరిసరాలు అపరిశుభ్రంగా ఉన్నాయి. ప్రస్తుతం పార్కు నిర్వాహణ ఊసే లేదు. పార్కును పునరుద్ధరించి సేద తీరేందుకు సౌకర్యాలు కల్పించాలి.
- అందం రామారావు, ధర్మవరం గ్రామం
ఆకట్టుకునేలా పార్కు సుందరీకరణ
గాంధీ పార్కులో సేదదీరేందుకు వచ్చినవారిని ఆకట్టుకునేలా అభివృద్ధి చేస్తాం. పార్కు సుందరీకరణలో భాగంగా చుట్టూ ప్లాంటేషన్‌, కొత్తరకం పూల మొక్కలతో ఆహ్లాదకరంగా తయారు చేస్తాం. సుందరీకరణకు సుమారు రూ.పది లక్షలు ఖర్చవుతుంది. కొంతమంది దాతలు ముందుకు వస్తున్నారు. దాతలు ఇచ్చే విరాళాలతో పంచాయతీ నిధులను కలిపి పార్కును అభివృద్ధి చేస్తాం. దసరా పండగ తర్వాత పనులు ప్రారంభిస్తాం.
- సిహెచ్‌ కన్నబాబు,
ఇఒ, శృంగవరపుకోట మేజరు పంచాయతీ
