ప్రజాశక్తి - లక్కవరపుకోట : స్థానిక ఎంపిడిఒ కార్యాలయంలో మంగళవారం నిర్వహించిన మండల సర్వసభ్య సమావేశం సాదాసీదాగా సాగింది. సుమారుగా అన్ని శాఖల అధికారులు హాజరైనప్పటికి ఎంపిపి గేదెల శ్రీనివాసరావుతో సహా కొంతమంది సర్పంచులు, ఎంపిటిసిలు గైర్హాజరయ్యారు. సమావేశ సమయానికి కొట్యాడ సర్పంచ్‌ కొట్యాడ దేవి హాజరైనప్పటికీ మిగిలిన సభ్యులు రాకపోవడంతో గంటన్నర పాటు ఆలస్యంగా సమావేశం మొదలైంది. ఆరుగురు సర్పంచులు, ఇద్దరు ఎంపిటిసిలు, కో ఆప్షన్‌ సభ్యులు షేక్‌ ఖాసిం హాజరయ్యారు. వచ్చినవారు కూడా వెనుతిరగడంతో కొట్యాడ, మల్లివీడు , తామరాపల్లి , గంగుపూడి పంచాయతీల సర్పంచులు కొట్యాడ దేవి, ఆదిరెడ్డి అర్జున్‌, ముత్యం భాస్కరరావు, జి.హరిప్రసాద్‌, రేగ ఎంపిటిసి బొడ్డు గణపతి మాత్రమే చివరి వరకు ఉన్నారు.
ఎంపిడిఒ కె.రూపేష్‌ ఆధ్వర్యంలో జరిగిన సమావేశానికి వైస్‌ ఎంపిపి ఆవాల శ్యామల అధ్యక్షత వహించారు. గత సమావేశంలో అధికారుల దృష్టికి తీసుకొచ్చిన సమస్యలు ఎంతవరకు పరిష్కారం జరిగాయని ఆరా తీశారు. కొట్యాడ సర్పంచ్‌ దేవి మాట్లాడుతూ పంచాయతీలో 30 మంది జగనన్న గృహ లబ్ధిదారులకు స్థలం చూపించలేదన్నారు. జగనన్న లేఔట్‌లో మద్దిల అప్పారావు అక్రమంగా వేసిన రేకుల షెడ్డు తొలగించాలని కోరారు. మహామాయ , గోల్డ్‌ స్టార్‌ పరిశ్రమల ద్వారా వెదజల్లుతున్న కాలుష్యం కారణంగా పంట పొలాలు, చెరువులు నాశనం అవుతున్నాయని తామరాపల్లి సర్పంచ్‌ ముత్యం భాస్కరరావు అధికారుల దృష్టికి తీసుకొచ్చారు. ప్రతి సర్వసభ్య సమావేశంలోనూ ఈ సమస్య ప్రస్తావించినా అధికారులు పట్టించుకోకపోవడం బాధాకరమన్నారు. ఈ సమావేశంలో ఎంఇఒ సిహెచ్‌ కూర్మారావు, పిహెచ్‌సి వైద్యాధికారి పివి మురళీకృష్ణ, ఎఒ స్వాతి, పశు వైద్యాధికారి గాయత్రి, హౌసింగ్‌ ఎఇ సత్యనారాయణ, ఎపిఎం అప్పలనాయుడు, ఎపిఒ విజయలక్ష్మి పాల్గొన్నారు.
