ప్రజాశక్తి-విజయనగరం : రాష్ట్ర అభివృద్ధికి విశాఖపట్నం గ్రోత్‌ ఇంజిన్‌లాంటిదని సి.రాఘవాచారి రాష్ట్ర మీడియా అకాడమీ ఛైర్మన్‌ కొమ్మినేని శ్రీనివాసరావు అన్నారు. విజయనగరం జిల్లాలో బుధవారం ఆయన పర్యటించారు. రామనారాయణం, పైడితల్లి అమ్మవారి ఆలయం, రామతీర్ధం శ్రీసీతారామస్వామి ఆలయాలను సందర్శించారు. పైడితల్లి అమ్మవారి ఆలయం వద్ద మీడియాతో మాట్లాడారు. గతంలో ఎన్నడూ లేనివిధంగా, పోర్టులు, వివిధ రకాల ప్రాజెక్టుల రూపంలో అభివృద్ది కార్యక్రమాలు జరుగుతున్నాయని ఛైర్మన్‌ అన్నారు. విజయనగరంలో ప్రభుత్వ వైద్య కళాశాల, శ్రీకాకుళం జిల్లాలో మూలపేట పోర్టు, విశాఖలో ఇన్‌ఫోసిస్‌ కేంద్రం లాంటివాటిని ఉదహరించారు. అభివృద్దికి విశాఖ కేంద్రంగా ఉత్తరాంధ్ర ముఖచిత్రం మారుతోందని అన్నారు. గతంలో ఉత్తరాంధ్ర నుంచి వలసలు ఎక్కువగా ఉండేవని, ఉపాధి అవకాశాలు పెరగడంతో ప్రస్తుతం బాగా తగ్గాయని తెలిపారు. విశాఖపట్నం ఇప్పటికే ఎంతో అందమైన నగరమని, దానిని మరింత అందంగా, అభివద్దికి కేంద్రంగా మార్చేందుకు ముఖ్యమంత్రి కృషి చేస్తున్నారని చెప్పారు. జగనన్న ఆరోగ్య సురక్ష మరో అద్భుత కార్యక్రమమని ప్రశంసించారు. మీడియా అకాడమీ పరంగా జర్నలిస్టుల్లో నైపుణ్యాన్ని పెంచేందుకు కృషి చేస్తున్నామని, దీనిలో భాగంగా ప్రతీ శనివారం ఆన్‌లైన్‌లో క్లాసులు నిర్వహిస్తున్నామని తెలిపారు. వివిధ రకాల పుస్తకాలను ప్రచురిస్తున్నామని వివరించారు. పర్యటనలో ఒఎస్‌డి శ్రీనివాస్‌ జీవన్‌ తదితరులు పాల్గొన్నారు.
