ప్రజాశక్తి-డెంకాడ : మండలంలోని డి.కొల్లం పంచాయతీ అభివృద్ధి పథంలో సాగుతోంది. సర్పంచ్‌ అట్టాడ శివకృష్ణ పంచాయతీ నిధులతో పాటు మండల, జిల్లా పరిషత్తు, ఎమ్మెల్యే నిధులతో గ్రామాన్ని అభివృద్ధి చేస్తున్నారు. ఈ పంచాయతీ పరిధిలో డి.కొల్లాంతోపాటు కె.కొల్లాం, రెడ్డికపేట, ఆర్‌.ముంగినాపల్లి గ్రామాలు ఉన్నాయి. మొన్నటి వరకు ఆయా గ్రామాల్లో సిసి రోడ్లు గాని, కాలువలు గాని లేకపోవడంతో గ్రామాల్లో వర్షపు నీరు, వాడుకనీరు నిల్వ ఉండిపోయేవి. దీంతో ప్రజలు చాలా ఇబ్బందులు పడుతుండేవారు. కె.కొల్లాం గ్రామంలోకి వెళ్లడానికి ముందు చెరువుగట్టు ఉండేది. ఆ గట్టుపై నుంచి మట్టి రోడ్డు ద్వారా గ్రామంలోకి వెళుతుండేవారు. చెరువు నిండినా, వర్షం పడినా గ్రామానికి వెళ్లడానికి ఇబ్బందులు పడుతుండేవారు. సర్పంచ్‌ ఈ విషయాన్ని స్థానిక ఎమ్మెల్యే బడ్డుకొండ అప్పలనాయుడు దృష్టికి తీసుకెళ్లారు. వెంటనే ఆయన నాబార్డు నిధులు రూ.33 లక్షలు విడుదల చేయించి చెరువుగట్టుకు ఇరువైపులా రక్షణగోడ, గ్రామంలోకి వెళ్లడానికి సిసి రోడ్డు ఏర్పాటు చేశారు. తమ చిరకాల వాంఛ నెరవేరడంతో గ్రామస్తులు ఎమ్మెల్యేకు కృతజ్ఞతలు తెలిపారు. కె.కొల్లాంలో యాతపేటలో రూ.2.50 లక్షలతో స్టేజ్‌ ఏర్పాటు చేశారు. మరో రెండు లక్షల రూపాయలతో సిసి కాలువలు వేశారు. డి.కొల్లాం గ్రామంలో గడపగడపకు నిధులు సుమారు ఏడు లక్షల రూపాయలతో సిసి కాలువలు నిర్మించారు. ఆర్‌.ముంగినాపల్లి, రెడ్డికపేటలో మరో రూ.7.80 లక్షలతో సిసి కాలువలు ఏర్పాటుచేశారు.
సర్పంచ్‌ శివకృష్ణ మాట్లాడుతూ పంచాయతీ పరిధిలో ఉన్న నాలుగు గ్రామాల్లోనూ సిసి కాలువలు ఏర్పాటు చేస్తున్నట్లు తెలిపారు. సిసి రోడ్లపైనా దృష్టిపెట్టామని, అవసరం ఉన్న చోట నిర్మిస్తున్నామని తెలిపారు. పంచాయతీ అభివృద్ధికి సహకరించిన ఎమ్మెల్యే బడ్డుకొండ అప్పల నాయుడు, ఎంపిపి బంటుపల్లి వెంకట వాసుదేవ రావు, అధికారులకు ఆయన కృతజ్ఞతలు తెలిపారు.
