ప్రజాశక్తి-భోగాపురం : మండలంలోని గుడివాడ పంచాయతీలో శుక్రవారం పలు అభివృద్ధి పనులకు ఎమ్‌పి బెల్లాన చంద్రశేఖర్‌, ఎమ్మెల్యే బడ్డుకొండ అప్పలనాయుడు శంకుస్థాపనలు, ప్రారంభోత్సవాలు చేశారు. గుడివాడ గ్రామంలో రూ.1.40 కోట్లతో ఇంటింటి కుళాయిలకు ముందుగా శంకుస్థాపన చేశారు. అనంతరం రూ.23 లక్షలతో నిర్మించిన రైతు భరోసా కేంద్రం, 40 లక్షలతో నిర్మించిన సచివాలయ భవనాన్ని ప్రారంభించారు. అనంతరం గ్రామంలో జగనన్న ఆరోగ్య సురక్ష కార్యక్రమాన్ని పరిశీలించారు. వైద్య సేవలు ఏవిధంగా అందుతున్నాయో రోగులతో మాట్లాడి తెలుసుకున్నారు. అనంతరం జరిగిన సభలో ఎమ్మెల్యే మాట్లాడుతూ జగనన్న ఆరోగ్య సురక్ష కార్యక్రమం ప్రతిఒక్కరికీ ఎంతో ఉపయోగకరమని అన్నారు. వైసిపి మండల అధ్యక్షులు ఉప్పాడ సూర్యనారాయణ మాట్లాడుతూ మండల అభివృద్ధికి ఎమ్మెల్యే ఎంతో సహకరించారని అన్నారు. అనేక నిధులతో అభివృద్ధి చేసుకున్నామని, అందుకు మళ్లీ ఆయనను ఎమ్మెల్యేగా గెలిపించుకోవాలని కోరారు. ఈ కార్యక్రమంలో మాజీ సర్పంచులు దాసరి చంద్రశేఖర్‌, దాసరి లక్ష్మి, తహశీల్దారు బంగార్రాజు, ఎంపిడిఒ అప్పలనాయుడు, మాజీ జెడ్‌పిటిసి ప్రభాకరరెడ్డి, వైస్‌ ఎంపిపి రావాడబాబు, తదితరులు పాల్గొన్నారు.
