ప్రజాశక్తి-విజయనగరం టౌన్‌ : ప్రపంచం గర్వించదగ్గ దార్శనికుడు మాజీ రాష్ట్రపతి ఎపిజె అబ్దుల్‌ కలాం అని డిప్యూటీ స్పీకర్‌ కోలగట్ల వీరభద్రస్వామి కొనియాడారు. ఆదివారం అబ్దుల్‌ కలాం జయంతినిపురస్కరించుకుని స్థానిక కస్పా హై స్కూల్లో కలాం విగ్రహాన్ని కోలగట్ల ఆవిష్కరించారు. 1987 సంవత్సరంలో కస్పా హైస్కూల్లో చదివిన పూర్వ విద్యార్థులు అబ్దుల్‌ కలాం విగ్రహాన్ని సమకూర్చారు. అనంతరం పేదలకు దుప్పట్లను పంపిణీ చేశారు. ఈ సందర్భంగా ఆయన మాట్లాడుతూ శాస్త్ర సాంకేతిక రంగం పురోభివృద్ధికి అబ్దుల్‌ కలాం చేసిన సేవలు ఎనలేనివని అన్నారు. శాస్త్రవేత్తగా ఎన్నో సంస్కరణలు తీసుకొచ్చి ప్రపంచంలోనే వినూత్న ప్రయోగాలకు ఆద్యుడుగా నిలిచారని అన్నారు. భారత రాష్ట్రపతిగా ఆయన అందించిన సేవలు మరువరానివని గుర్తు చేశారు. కలాం ఆలోచనలు, చూపిన మార్గం భావితరాలకు అనుసరణీయమని పేర్కొన్నారు. కార్యక్రమంలో మేయర్‌ విజయలక్ష్మి, పాఠశాల హెచ్‌ఎం శంకర్రావు, స్థానిక కార్పొరేటర్‌ సయ్యద్‌ గౌస్‌, వైసిపి నాయకులు పిలకా శ్రీనివాసరావు, పూర్వ విద్యార్థుల ప్రతినిధులు విశ్వనాద్‌, షబ్బీర్‌ అహ్మద్‌, సుబ్రహ్మణ్యం తదితరులు పాల్గొన్నారు.
