హైదరాబాద్‌లోని రామోజీ ఫిల్మ్‌సిటీలో పుష్పా2, సలార్‌ సినిమాల షూటింగ్‌ చిత్రీకరణలతో సందడిగా ఉంది. 'పుష్ప 2' కోసం సుమారు వెయ్యిమంది డ్యాన్సర్లపై సాగే పాటని తెరకెక్కిస్తున్నారు. గణేశ్‌ ఆచార్య ఈ పాటకి నృత్య దర్శకత్వం వహిస్తున్నారు. నెల రోజులుపైగానే సాగే ఈ షెడ్యూల్‌లో ఓ పోరాట ఘట్టం, కొన్ని కీలక సన్నివేశాల్ని కూడా తెరకెక్కించనున్నట్టు సమాచారం. 'పుష్ప'కు సీక్వెల్‌గా 'పుష్ప2' చిత్రాన్ని తెరకెక్కిస్తున్నారు సుకుమార్‌. అల్లు అర్జున్‌, రష్మిక జంటగా నటిస్తున్న విషయం తెలిసిందే. మైత్రీ మూవీ మేకర్స్‌ సంస్థ పతాకంపై నవీన్‌ ఎర్నేని, వై.రవిశంకర్‌ సంయుక్తంగా నిర్మిస్తున్నారు. దేవిశ్రీప్రసాద్‌ స్వరకర్త. ప్రభాస్‌ హీరోగా నటిస్తున్న చిత్రం సలార్‌. ప్రశాంత్‌ నీల్‌ ఈ సినిమా దర్శకుడు. తెరకెక్కిస్తోన్న ఈ సినిమా చిత్రీకరణ ఫిల్మ్‌సిటీలో జరుగుతోంది. సిమ్రత్‌కౌర్‌ తదితరులపై ఓ ప్రత్యేక గీతాన్ని రూపొందిస్తున్నారు. రాజు సుందరం మాస్టర్‌ నృత్య దర్శకత్వం వహిస్తున్నారు. హోంబలే ఫిల్మ్స్‌ నిర్మిస్తున్న ఈ చిత్రంలో శ్రుతిహాసన్‌ కథానాయికగా, ఫృథ్వీరాజ్‌ ప్రతినాయకుడి పాత్రలోనూ నటిస్తున్నారు. డిసెంబరు 22న ఈ సినిమా విడుదల కానుంది.
