నష్టపోయిన రైతులకు పరిహారం ఇప్పించాలని కోరుతూ సిఎం జగన్మోహన్‌రెడ్డికి లేఖ
అమరావతి : రైతులకు కల్తీ విత్తనాలు అంటగట్టి మోసం చేసిన ప్రైవేట్‌ కంపెనీలపై చర్య తీసుకోవాలని, నష్టపోయిన రైతులకు పరిహారం ఇప్పించాలని కోరుతూ సిపిఎం రాష్ట్ర కార్యదర్శి వి శ్రీనివాసరావు సిఎం జగన్మోహన్‌రెడ్డికి బుధవారం లేఖ రాశారు. ఈ లేఖలో ఏముందంటే..
''పార్వతీపురం జిల్లా ప్రజా రక్షణ భేరి సందర్భంగా బుధవారం వివిధ గ్రామాలు పట్టణాలు సందర్శించాము. అందులో భాగంగా సాలూరు పట్టణం, పాచిపెంట తదితర మండలాల్లో స్థానిక ప్రజలు అందించిన విజ్ఞప్తిని మీ దఅష్టికి తీసుకువస్తున్నాను.రాష్ట్రంలో సాలూరు పట్టణం రవాణాకు పెద్ద కేంద్రాలలో ఒకటి. 1000 లారీలు పైగా ఇక్కడ నుండి నడుస్తున్నాయి. రవాణాకు ట్రాన్సిట్‌ కేంద్రంగా ఉంది. వేలాది మంది దీనిపై ఆధారపడి జీవిస్తున్నారు. వర్క్‌షాప్‌లు, రిపేర్‌షాప్‌ లు ఉన్నాయి. వీరందరి ఉపాధికి భద్రత కల్పించడానికి సాలూరు పట్టణంలో ఆటోనగర్‌ అభివఅద్ధి చేయాల్సిన అవసరం ఉంది. కొంతకాలం క్రితం అందుకోసం భూమి కేటాయించినా ఇంతవరకు ప్రారంభించలేదు. కాబట్టి తక్షణం ఆటోనగర్‌ ప్రారంభించి ఉపాధికి భద్రత కల్పించాలని విజ్ఞప్తి చేస్తున్నాను.సాలూరు, పాచిపెంట తదితర మండలాల్లో ఖరీఫ్‌లో బేయర్స్‌ కావేరి కంపెనీలు సరఫరా చేసిన కల్తీ మొక్కజన్న విత్తనాలతో 10 వేల ఎకరాల్లో పూర్తిగా పంట దెబ్బతిన్నది. కంకులు రాక రైతులు నష్టపోయారు. నష్టపరిహారం చెల్లిస్తామని హామీ ఇచ్చిన కంపెనీలు అడ్రస్‌ లేకుండా పోయాయి. తక్షణం ప్రభుత్వం జోక్యం చేసుకొని వ్యవసాయ శాఖ ద్వారా రెన్యుమరేషన్‌చేసి ఈ ప్రైవేట్‌ కంపెనీలపై చర్య తీసుకుని, రైతులకు నష్టపరిహారం ఇప్పించాలని, రైతులకు కల్తీ విత్తనాలు అంటగట్టి మోసం చేసిన ఈ ప్రైవేట్‌ కంపెనీలపై చర్య తీసుకోవాలని కోరుతున్నాను.'' అని తెలిపారు.
