మాళవికమోహన్‌ ఈ పేరుకు కొత్త పరిచయాలు అవసరం లేదు. ప్రస్తుతం టాప్‌ మోస్ట్‌ హీరోయిన్‌గా తెలుగు, తమిళ, మలయాళ భాషల్లో వరుస చిత్రాలు చేస్తున్నారు. నటి మాళవిక మోహన్‌.. ప్రభాస్‌-మారుతీ దర్శకత్వంలో తెరకెక్కుతున్న 'రాజా డీలక్స్‌' సినిమాలో మొదటి హీరోయిన్‌గా నటిస్తున్నారు. భాషల మధ్య అంతరాలు, చిత్ర పరిశ్రమల మధ్య హద్దులు చెరిగిపోతున్న ప్రస్తుత కాలంలో పాన్‌ ఇండియా ట్రెండ్‌లో భాగంగా నాయికలకు మరింత స్వేచ్ఛగా అవకాశాలు అందుతున్నాయి. ఈ సమయాన్ని సద్వినియోగం చేసుకుంటున్నారు.. మాళవిక మోహన్‌. ఈ నేపథ్యంలో ఆమె గురించిన మరిన్ని విశేషాలు...
మాళవిక మోహన్‌ చేసింది తక్కువ సినిమాలే.. అయినా ప్రేక్షకుల్లో ఆమె క్రేజ్‌ అంతాఇంతా కాదు. మోడల్‌గా కెరీర్‌ ప్రారంభించి, బాలీవుడ్‌లో నటించిన మాళవిక మోహన్‌ తర్వాత తెలుగు, తమిళ తెరపై తన సత్తా చాటుకుంటున్నారు. విభిన్న పాత్రల్లో నటిస్తూ ప్రేక్షకులను అలరిస్తున్నారు. సౌత్‌ ఇండిస్టీలో తన మార్క్‌ చూపించేందుకు ప్రయత్నిస్తున్నారు. ప్రభాస్‌, మారుతీ కాంబోలో రానున్న చిత్రంలో హీరోయిన్‌గా సెలెక్ట్‌ అయ్యారు. కాగా 'పెట్టం పోలె' అనే మలయాళీ చిత్రంతో 2013లో హీరోయిన్‌గా ఎంట్రీ ఇచ్చారు మాళవిక. ఆ తర్వాత సూపర్‌స్టార్‌ రజనీకాంత్‌ నటించిన 'పేట' చిత్రంలో కీలకపాత్ర పోషించి, తమిళ చిత్ర పరిశ్రమకూ పరిచయమయ్యారు. ఆ మధ్య విజరు హీరోగా, లోకేష్‌ కనకరాజ్‌ దర్శకత్వంలో వచ్చిన 'మాస్టర్‌' సినిమాలోనూ నటించారు. కాగా మలయాళ, హిందీ చిత్రాల్లో ప్రముఖ సినిమాటోగ్రాఫర్‌గా పనిచేసి మంచిపేరు సంపాదించిన కె.యు.మోహనన్‌ కుమార్తె ఈమె. 'మహర్షి' చిత్రానికీ ఆయన పనిచేశారు. ప్రస్తుతం ఈ నాయిక విక్రమ్‌ సరసన 'తంగలాన్‌', 'క్రిస్టీ', 'రుద్ర' వంటి చిత్రాల్లో నటిస్తున్నారు.
- వారితో నటించాలనుంది..
ఎప్పుడూ సోషల్‌ మీడియాలో యాక్టివ్‌గా ఉంటూ అభిమానులతో టచ్‌లో ఉండే మాళవిక వారిని ఖుషీ చేసేందుకు అప్పుడప్పుడు లైవ్‌లో వారితో ఇంటరాక్ట్‌ అవుతుంటారు. అభిమానులతో ముచ్చటిస్తూ అభిమానులు, నెటిజన్లు అడిగిన ప్రశ్నలకు బదులిస్తుంటారు. ఆ మధ్య ఇలాగే అభిమానులతో ముచ్చటిస్తున్న సందర్భంగా ఓ నెటిజన్‌ 'మీరు ఇప్పటి వరకూ తమిళ బిగ్‌ స్టార్స్‌ రజినీకాంత్‌, దళపతి విజరుతో నటించారు కదా.. ఇంకా ఎవరితో నటించాలని ఉంది' అని అడగ్గా.. ఆమె బదులిస్తూ.. 'విజరు దేవరకొండ, మహేష్‌బాబు, ప్రభాస్‌తో నటించాలని ఉంది' అంటూ బదులిచ్చారు. 'ఇక 'మహర్షి' చిత్రీకరణ సమయంలో నాన్న మోహనన్‌తో కలిసి షూటింగ్‌కు వెళ్లాను. అక్కడ మహేష్‌ను కలిసే అవకాశం వచ్చింది. ఆయన ఎంతో ఫ్రెండ్లీగా పలకరించారు. మహేష్‌తో కలిసి నటించేందుకు ఎదురుచూస్తున్నా' అని చెప్పారు. ప్రస్తుతానికి మారుతీ కాంబినేషన్‌లో ప్రభాస్‌తో నటించే అవకాశం దక్కించుకున్న మాళవిక.. మరికొందరు స్టార్స్‌ సరసన నటించేందుకు ఉత్సాహం చూపిస్తున్నారు.
- ఆ వ్యాఖ్య లింగ వివక్ష గురించి మాత్రమే..
మరో నెటిజన్‌.. 'కన్నడ సినిమాల్లో నటిస్తారా?' అని ప్రశ్నించగా.. 'మంచి అవకాశం వస్తే ఓకే చేస్తా. కన్నడ నటుడు యశ్‌కు నేను వీరాభిమానిని. 'కేజీయఫ్‌' విడుదల కాకముందు నుంచే ఆయనంటే నాకెంతో ఇష్టం. ఏదో ఒకరోజు ఆయన ఉన్నత శిఖరాలు అధిరోహిస్తారని అప్పుడే అనుకున్నా. ఆయన లైఫ్‌స్టోరీ ఎంతోమందికి స్ఫూర్తిదాయకం' అని బదులిచ్చారు.
కాగా నయనతార వివాదం విషయంలోనూ స్పందించారు. దీనిపై మాళవిక మోహన్‌ వివరణ ఇస్తూ.. తన వ్యాఖ్య లింగ వివక్ష గురించి మాత్రమే అని వివరించడానికి ఇటీవల ట్విట్టర్‌లో పోస్ట్‌ పెట్టారు.
'నేను ఆ పేరు గురించి మాట్లాడానే కానీ పర్టిక్యులర్‌గా ఎవర్నీ ఉద్దేశించి మాట్లాడలేదు. నేను నయనతారను నిజంగా గౌరవిస్తాను, ఆరాధిస్తాను. ఒక సీనియర్‌గా ఆమె జర్నీ ఎంతో ఆదర్శం. దయచేసి అభిమానులు దీనిని వివాదం చేయకండి. ఓన్లీ లవ్‌ టు మిస్‌ ఎన్‌.' అంటూ ట్వీట్‌ చేశారు.
- సినిమాటోగ్రఫీ మీద ఆసక్తితో...
తండ్రి స్వయానా డైరెక్టర్‌, సినిమాటోగ్రాఫర్‌ కావడంతో ముంబై విల్సన్‌ కాలేజీలో మాస్‌ మీడియా పూర్తిచేసిన ఆమె తరువాత చదువుకోకుండా తన తండ్రితో పాటు సినిమాటోగ్రఫీ మీద ఆసక్తి పెంచుకున్నారు. ఈ క్రమంలో మమ్ముట్టి చేస్తున్న ఒక ఫెయిర్నెస్‌ క్రీమ్‌ యాడ్‌ కోసం ఆమె కూడా తండ్రితో పాటు పనిచేశారు. ఆ యాడ్‌లో తండ్రికి సాయం చేస్తున్నప్పుడు చూసి అమ్మాయి బాగుండడంతో ఆమెకు నటన మీద ఆసక్తి ఉందనే విషయం తెలుసుకున్న మమ్ముట్టి తన కుమారుడు సల్మాన్‌ హీరోగా రూపొందుతున్న సినిమాలో హీరోయిన్‌ అవకాశం ఇచ్చారు. ఆ తర్వాత రజనీకాంత్‌ హీరోగా రూపొందిన 'పెట్టా'లో కీలక పాత్రలో నటించారు. అలా తమిళ ప్రేక్షకులకు బాగా దగ్గరయ్యారు. ఈ చిత్రం తెలుగులోనూ విడుదల కావడంతో తెలుగు ప్రేక్షకులకూ దగ్గరయ్యారు.
పేరు: మాళవిక మోహన్‌
పుట్టిన తేదీ: ఆగస్టు 5, 1993
పుట్టిన ప్రాంతం: పయ్యనూర్‌, కన్నూర్‌ జిల్లా,
కేరళ నివాస ప్రాంతం: ముంబై
చదువు: మాస్‌ మీడియాలో గ్రాడ్యుయేషన్‌
హాబీస్‌: డ్యాన్సింగ్‌, రీడింగ్‌, ట్రావెలింగ్‌
తల్లిదండ్రులు: కెయు మోహనన్‌, బీనా మోహనన్‌
తోబుట్టువులు: ఆదిత్య మోహనన్‌
