సినీ ప్రపంచంలో విలక్షణ నటుడు కమల్‌హాసన్‌ గురించి తెలియని వారుండరు. ఆయన ప్రధానంగా దక్షిణ భారత చిత్రాలలో నటించినా దేశమంతటా సుపరిచితుడు. కేవలం మూడున్నర సంవత్సరాలకే చిత్ర రంగంలోకి ప్రవేశించారు. ఆయన మొదటి చిత్రం ''కలత్తూర్‌ కన్నమ్మ''. యువకుడిగా ఉన్నప్పుడే నృత్య దర్శకుడిగా పనిచేశారు. 70వ శతాబ్దం నుంచి పూర్తిస్థాయిలో సినిమాల్లో నటించడం మొదలెట్టారు. తెలుగులో 'వసంత కోకిల, ఆకలిరాజ్యం' చిత్రాలు ఆయనకు మంచిపేరు తెచ్చాయి.
కొంతకాలం క్రితం 'మక్కల్‌ నీది మయ్యమ్‌ (ఎంఎన్‌ఎం)' పార్టీని స్థాపించారు కమల్‌. ఈ మధ్యే వచ్చే ఏడాది జరగనున్న తమిళనాడు అసెంబ్లీ ఎన్నికల ప్రచారానికి శ్రీకారం చుట్టారాయన. అందులో భాగంగానే ప్రధానిపై పలు ప్రశ్నలు సంధించారు.
ప్రధాని మోడీ కొత్త పార్లమెంట్‌ భవనానికి ఈ మధ్యే భూమిపూజ నిర్వహించిన సంగతి తెలిసిందే. మొత్తం సెంట్రల్‌ విస్టా ప్రాజెక్ట్‌ కోసం రూ.20,000 కోట్లను కేంద్ర ప్రభుత్వం ఖర్చు పెట్టనుంది. ఈ భవనానికి కేవలం శంకుస్థాపన మాత్రమే నిర్వహించాలని, నిర్మాణ పనులు ప్రారంభించవద్దని సర్వోన్నత న్యాయస్థానం ఆదేశాలు జారీ చేసింది. ఈ నేపథ్యంలో ట్విట్టర్‌ వేదికగా మోడీపై కమల్‌ విమర్శలు గుప్పించారు. 'దేశంలోని సగం మందికి తిండి లభించడం లేదు. కరోనా వైరస్‌ కారణంగా అందరి జీవితాలు ప్రభావితమయ్యాయి. మీరేమో వేల కోట్లతో కొత్త పార్లమెంట్‌ నిర్మాణానికి రూపకల్పన చేశారు. ఎవరిని రక్షించేందుకు మీరు వేల కోట్ల రూపాయల ఖర్చు చేస్తున్నారు? దయచేసి నా ప్రశ్నలకు సమాధానం ఇవ్వండి ప్రధానమంత్రి మోదీ గారు' అని కమల్‌ సూటిగా ప్రశ్నించారు.
పేరు : కమల్‌ హాసన్‌
పుట్టిన తేదీ : 1954, నవంబరు 7
నివాస ప్రాంతం : చెన్నై, తమిళనాడు
వృత్తి : సినిమా నటుడు, దర్శకుడు, నిర్మాత, గాయకుడు, నత్య దర్శకుడు, కథా రచయిత, మాటల రచయిత
రాజకీయ పార్టీ : మక్కల్‌ నీది మయ్యం
మతం : నాస్తికుడు
పిల్లలు : శ్రుతిహాసన్‌, అక్షరహాసన్‌
తండ్రి : శ్రీనివాసన్‌
తల్లి : రాజ్యలక్ష్మి
