అసలు పేరు : నందమూరి తారక రామారావు
పుట్టిన తేదీ : 1983 మే 20
నివసించేది : హైదరాబాదు (తెలంగాణ)
ఇతర పేర్లు : జూనియర్‌ ఎన్టీఆర్‌, యంగ్‌ టైగర్‌, తారక్‌
వృత్తి : సినిమా నటుడు
తండ్రి : నందమూరి హరికృష్ణ
తల్లి : షాలినీ భాస్కర్‌రావు
భార్య : లక్ష్మీ ప్రణతి
పిల్లలు : ఇద్దరు
రహదారి భద్రత కోసం ప్రభుత్వాలు ఎన్ని చర్యలు తీసుకున్నా నిత్యం రోడ్డు ప్రమాదాలు జరుగుతూనే ఉన్నాయి. మితిమీరిన వేగం, హెల్మెట్‌ లేకపోవడం వంటి కారణాలతో ఎక్కువ మంది అర్ధాంతరంగా ప్రాణాలను కోల్పోతున్నారు. మానవ తప్పిదాల వల్లే ప్రమాదాలు ఎక్కువగా జరుగుతున్నాయి. రోడ్డు ప్రమాదాలు తమ కుటుంబాన్ని ఎలా ప్రభావితం చేశాయో ఈ మధ్య సైబరాబాద్‌ ట్రాఫిక్‌ పోలీసుల వార్షిక సమావేశంలో పాల్గొన్న జూనియర్‌ ఎన్టీఆర్‌ చెప్పుకొచ్చారు. 'మీ అందరి మధ్యకు నేను హీరోగా రాలేదు.. బాధితుడిగా వచ్చా!' అంటూ ఆలోచింపజేసే వ్యాఖ్యలు చేశారు.
'రోడ్డు ప్రమాదంలో అన్న, నాన్నల్ని కోల్పోయిన బాధితుడిగా వచ్చా!' అంటూ ఈ మధ్య సైబరాబాద్‌ ట్రాఫిక్‌ పోలీసుల వార్షిక సమావేశంలో పాల్గొన్న జూనియర్‌ ఎన్టీఆర్‌ భావోద్వేగంతో అన్న మాటలివి. 'ప్రపంచాన్ని వణికించిన కరోనా మహమ్మారికి వ్యాక్సిన్‌ ఉంది. కానీ రోడ్డు ప్రమాదాలకు ఎటువంటి పరిష్కారము లేదు!' అంటూ ఆయన వ్యాఖ్యానించారు. 'ఇంటి నుంచి బయటకు వెళ్ళేటప్పుడు మన కోసం ఎదురుచూసే వాళ్లు ఇంట్లో ఉన్నారని గుర్తు పెట్టుకుని, జాగ్రత్తగా ఉండాలి' అని సూచించారు. 'రోడ్డు ప్రమాదాల నివారణకు ఎవరికి వారే అప్రమత్తంగా ఉండాలి' అన్నారు.
బిజినెస్‌ మెన్‌గా..
టాలీవుడ్‌లో హెల్దీ కాంపిటీషన్‌ ఉంటుందన్న విషయం అందరికీ తెలిసిందే. ఒకరిని చూసి ఒకరు పోటీపడి సినిమాలు చేయడమే కాదు. రెండు చేతులా సంపాదిస్తున్నారు. ఇటు సినిమాల్లోనూ.. అటు బిజినెస్‌లోనూ దూసుకుపోతున్నారు. అలాంటి వారిలో యంగ్‌ హీరో రామ్‌చరణ్‌ ముందున్నారు. అయితే ఇప్పుడీ హీరోను యంగ్‌ టైగర్‌ ఎన్టీఆర్‌ ఫాలో అవుతున్నాడు. చరణ్‌లా బిజినెస్‌ మెన్‌ అవ్వాలని ట్రై చేస్తున్నాడట. అన్న కల్యాణ్‌రామ్‌ బ్యానర్‌ కాకుండా తనకంటూ ఓ సొంత బ్యానర్‌ ఏర్పాటు చేసుకోవాలని ఫిక్స్‌ అయినట్లు తెలుస్తోంది. గతంలోనూ ఈ వార్త హల్‌చల్‌ చేసింది. కానీ ఆ తర్వాత చడీచప్పుడు లేకుండా పోయింది. తాజాగా మరోసారి ఈ విషయం టాలీవుడ్‌లో చర్చకు వచ్చింది.
బుల్లితెరపై మరోసారి
మరోసారి బుల్లితెరపై హోస్ట్‌గా అలరించబోతున్నారట యంగ్‌ టైగర్‌ ఎన్టీఆర్‌. ఈ మేరకు ఇప్పటిదాకా టెలివిజన్‌ చరిత్రలో లేనివిధంగా ఆయనకు కళ్లు చెదిరే రెమ్యూనరేషన్‌ ఆఫర్‌ చేశారని తెలుస్తోంది. వెండితెరపై సత్తా చాటుతూ, అదే స్థాయిలో బుల్లితెరపై ఆదరణ పొందే హీరోలు కొందరే ఉంటారు. అందులో ఒకరు నందమూరి వారసుడు, యంగ్‌ టైగర్‌ ఎన్టీఆర్‌. తెలుగు తెరపై తనదైన నటనతో భారీ పాపులారిటీ కూడగట్టుకున్న ఆయన బిగ్‌బాస్‌ సీజన్‌- 1తో బుల్లితెరపైకి ఎంట్రీ ఇచ్చి, విమర్శకుల ప్రశంసలు అందుకున్నారు. తాజాగా బుల్లితెరపై ప్రసారం కానున్న మరో పాపులర్‌ షో 'మీలో ఎవరు కోటీశ్వరుడు' కి హోస్ట్‌గా చేసేందుకు అంగీకరించారని తెలుస్తోంది.
మీరేంటి ఇలా చేస్తున్నారు?
ట్రాఫిక్‌ పోలీసుల వార్షిక సమావేశంలో పాల్గొన్న జూనియర్‌ జబర్దస్త్‌ కమెడియన్‌ రైజింగ్‌ రాజుకు సన్మానం చేశారు. రాజు స్టేజీపైకి రాగానే జూనియర్‌ కాళ్లు పట్టుకున్నాడు. అనుకోని పరిణామంతో ఉలిక్కిపడ్డ జూనియర్‌ 'మీరేంటి ఇలా చేస్తున్నారు? మీరు నాకన్నా వయస్సులో చాలా పెద్దవారు. అలా చేయకూడదు!' అన్నారు. వెంటనే తిరిగి రాజుకు నమస్కారం చేశారు. ఎదుటివ్యక్తి స్థాయిని కాకుండా వారి వయస్సుకు ఆయనిచ్చే మర్యాద చూసి, అక్కడున్న వారంతా ఫిదా అయ్యారు. ప్రస్తుతం ఎన్టీఆర్‌, రాజు వీడియో ట్రెండింగ్‌ అవుతుంది.
