నాసా అంతరిక్ష కేంద్రం నుంచి తీసిన ఈ అద్భుతమైన చిత్రాలను చూస్తే తప్పకుండా ఆశ్చర్యపోతారు. మనం హిమాలయాలను ఇప్పటివరకు నేలపై నుంచి మాత్రమే చూసి ఉంటాం. అయితే, నాసా సరికొత్త కోణంలో హిమాలయాలను ప్రపంచానికి చూపించింది 'అంతరిక్షం నుంచి హిమాలయాలు ఎంత అందంగా కనిపిస్తాయో చూడండి!' అంటూ అరుదైన చిత్రాలను ఇన్‌స్ట్రాగ్రామ్‌లో పోస్ట్‌ చేసింది.
ఈ చిత్రాల్లో హిమాలయాలతో పాటు రాత్రివేళ వెలుగులీనుతున్న దేశ రాజధాని ఢిల్లీతోపాటు వివిధ రాష్ట్రాల్లోని ప్రధాన నగరాలనూ చూడవచ్చు.
హిమాలయాలు గురించి ప్రత్యేకంగా పరిచయం అక్కర్లేదు. ట్రావెలింగ్‌ను ఇష్టపడేవారికి, ప్రకృతి ప్రేమికులకు హిమాలయాలను సందర్శించడమనేది ఒక కల.
అంతర్జాతీయ అంతరిక్ష కేంద్రం తీసిన ఈ చిత్రాలు ఇప్పుడు సోషల్‌ మీడియాలో వైరల్‌గా మారాయి. ఈ పోస్టులో నాసా హిమాలయాల ప్రత్యేకతను కూడా తెలిపింది. హిమాలయాలు ప్రపంచంలోనే అత్యంత ఎత్తయినవని, గత 50 మిలియన్‌ ఏళ్లుగా భూమి పొరల్లో కలుగుతున్న మార్పు, చేర్పుల వల్ల ఇవి రూపొందినట్లు పేర్కొన్నారు. ఈ చిత్రంలో ఉత్తర భారతదేశంతోపాటు పాకిస్థాన్‌లోని కొంతభాగాన్నీ చూడవచ్చని తెలిపింది.
