హైదరాబాద్‌ : జీఎంఆర్‌ హైదరాబాద్‌ అంతర్జాతీయ విమానాశ్రయానికి అంతర్జాతీయ రేటింగ్‌ సంస్థ స్కైట్రాక్స్‌ నుంచి 4 స్టార్‌ రేటింగ్‌ లభించింది. ఇటీవల నిర్వహించిన ఆడిట్‌ తర్వాత దీన్ని ప్రకటించినట్లు జీఎంఆర్‌ హైదరాబాద్‌ ఇంటర్నేషనల్‌ ఎయిర్‌పోర్ట్స్‌ లిమిటెడ్‌ (జీహెచ్‌ఐఏఎల్‌) వెల్లడించింది. ప్రపంచంలోని విమానాశ్రయాల నాణ్యతకు స్కైట్రాక్స్‌ రేటింగ్‌లను ప్రామాణికంగా తీసుకుంటారని తెలిపింది. విమానాశ్రయం నిర్వహణ, ప్రయాణికులకు అందిస్తున్న సేవలు, పరిశుభ్రత ఇలా పలు అంశాలను పరిగణనలోకి తీసుకొని, ఈ రేటింగ్‌ను అందిస్తుంది. భవిష్యత్‌ను దఅష్టిలో పెట్టుకొని అధునాతన డిజిటల్‌ టెక్నాలజీలను అమలు చేయడం ద్వారా ప్రయాణికులకు మెరుగైన సేవలను అందిస్తున్నామని, దీని ఫలితమే ఈ రేటింగ్‌ అని జీహెచ్‌ఐఏఎల్‌ సీఈఓ ప్రదీప్‌ పణికర్‌ హర్షాన్ని వ్యక్తం చేశారు.
