ప్రజాశక్తి-యంత్రాంగం:ప్రముఖ సీనియర్‌ నటులు చంద్రమోహన్‌ (82) ఇకలేరు. హృద్రోగ సమస్యతో బాధపడుతూ తెలంగాణ రాష్ట్రం హైదరాబాద్‌లోని జూబ్లిహిల్స్‌ అపోలో ఆస్పత్రిలో చికిత్స పొందుతున్న ఆయన శనివారం ఉదయం సుమారు తొమ్మిది గంటల సమయంలో తుదిశ్వాస విడిచారు. చంద్రమోహన్‌కు భార్య జలంధర, ఇద్దరు కుమార్తెలు ఉన్నారు. ఆయన మృతితో తెలుగు చిత్రసీమలో విషాద ఛాయలు అలుముకున్నాయి. పలువురు సినీ ప్రముఖులు సంతాపం వ్యక్తం చేశారు. ఆస్పత్రి నుంచి శనివారం మధ్యాహ్నం ఫిల్మ్‌నగర్‌లోని చంద్రమోహన్‌ నివాసానికి భౌతికకాయాన్ని తరలించారు. అమెరికాలో ఉన్న చిన్న కుమార్తె మధుర మీనాక్షి వచ్చిన తర్వాత సోమవారం అంత్యక్రియలు నిర్వహించనున్నట్లు ఆయన మేనల్లుడు కృష్ణప్రసాద్‌ తెలిపారు. కృష్ణా జిల్లా పమిడిముక్కలలో 1943 మే 23న జన్మించిన చంద్రమోహన్‌ అసలు పేరు మల్లంపల్లి చంద్రశేఖర్‌ రావు. బాపట్ల వ్యవసాయ కళాశాలలో డిగ్రీ పూర్తి చేశారు. 1966లో రంగులరాట్నం సినిమాతో అరంగేట్రం చేశారు. పలు తమిళ సినిమాల్లోనూ నటించారు. తన నటనకుగానూ ఫిలింఫేర్‌, నంది అవార్డులు అందుకున్నారు. 'పదహారేళ్ల వయసు', 'సిరిసిరిమువ్వ' సినిమాల్లో ఆయన నటనకు ఉత్తమ నటుడిగా ఫిలింఫేర్‌ అవార్డులు దక్కాయి. 1987లో 'చందమామ రావే' సినిమాకు ఉత్తమ హాస్యనటుడిగా నంది అవార్డు, 2005లో 'అతనొక్కడే' సినిమాకు ఉత్తమ సహాయ నటుడిగా అవార్డు అందుకున్నారు.
ప్రముఖుల సంతాపం
చంద్రమోహన్‌ మరణంతో చిత్ర పరిశ్రమలో విషాద ఛాయలు అలుముకున్నాయి. నటులు పవన్‌కల్యాణ్‌, ఆర్‌.నారాయణమూర్తి, శివకృష్ణ, నటి ప్రభ, సినీ రచయిత పరచూరి గోపాలకృష్ణ తదితరులు ఆయన భౌతికకాయాన్ని సందర్శించి నివాళులర్పించారు. చంద్రమోహన్‌ మృతికి సంతాపం ప్రకటిస్తూ పలువురు సినీ, రాజకీయ ప్రముఖులు సామాజిక మాధ్యమాల్లో స్పందించారు. దశాబ్దాలుగా తెలుగు ప్రేక్షకులను చంద్రమోహన్‌ అలరించారని తెలంగాణ సిఎం కెసిఆర్‌ పేర్కొన్నారు. ఆయన మృతి తెలుగు చలనచిత్ర పరిశ్రమకు తీరని లోటని తెలిపారు. చంద్రమోహన్‌ స్ఫూర్తితో ఎందరో నటీనటులుగా ఎదిగారన్నారు. తెలుగు చిత్రసీమకు చంద్రమోహన్‌ చేసిన సేవలను కెసిఆర్‌ స్మరించుకున్నారు. మాజీ ఉపరాష్ట్రపతి వెంకయ్యనాయుడు, నటులు చిరంజీవి, బాలకృష్ణ, వెంకటేశ్‌, జూనియర్‌ ఎన్‌టిఆర్‌, సాయి ధరమ్‌ తేజ్‌, కల్యాణ్‌రామ్‌, టిడిపి నేత లోకేశ్‌, ఎంపి రఘురామకృష్ణరాజు తదితరులు సంతాపం ప్రకటించారు.
సిపిఎం సంతాపం
చంద్రమోహన్‌ మృతి పట్ల సిపిఎం ఎపి రాష్ట్ర కార్యదర్శి వి.శ్రీనివాసరావు సంతాపం వ్యక్తం చేశారు. ఆయన మరణం తెలుగు చిత్ర రంగానికి తీరని లోటని పేర్కొన్నారు. చంద్రమోహన్‌ కుటుంబ సభ్యులకు సానుభూతి తెలిపారు.
కళారంగానికి తీరనిలోటు : పిఎన్‌ఎం
చంద్రమోహన్‌ మృతి సినీ, కళారంగానికి తీరని లోటని ప్రజా నాట్యమండలి ఎపి రాష్ట్ర అధ్యక్ష, కార్యదర్శులు మంగరాజు, అనిల్‌ సంతాపం తెలిపారు. వందలాది సినిమాల్లో వైవిధ్య భరితమైన పాత్రలు పోషించారని పేర్కొన్నారు.
లోకేష్‌, బాలకృష, అచ్చెన్నాయుడు సంతాపం
చంద్రమోహన్‌ మృతికి టిడిపి జాతీయ ప్రధాన కార్యదర్శి లోకేష్‌, ఎపి రాష్ట్ర అధ్యక్షులు కె.అచ్చెన్నాయుడు, సినీహీరో, టిడిపి ఎమ్మెల్యే ఎన్‌.బాలకృష్ణ సంతాపం తెలిపారు.
