హైదరాబాద్‌: తెలంగాణ వ్యాప్తంగా ప్రచారాలు హోరెత్తుతున్నాయి. ప్రధాన పార్టీలన్నీ ప్రచారంలో బిజీబిజీగా గడుపుతున్నాయి. ఇందులో భాగంగానే యాదాద్రి భువనగిరి జిల్లాలోని ఆలేరు బీఆర్‌ఎస్‌ అభ్యర్థి, ఎమ్మెల్యే గొంగిడి సునీత మహేందర్‌ ఎన్నికల ప్రచారం నిర్వహిస్తున్నారు. ఈ క్రమంలో ఆలేరు పట్టణంలో భారీ ర్యాలీగా ప్రచారానికి వెళ్లగా.. అనుకోని ఘటన చోటుచేసుకుంది. సునీత ఎన్నికల ప్రచారం నిర్వహిస్తుండగా ఒక్కసారిగా తేనెటీగలు దాడి చేశాయి. దాంతో అందరూ అక్కడి నుంచి పరుగు తీశారు. ఎమ్మెల్యే అభ్యర్థి గొంగిడి సునీత, ప్రచార రథం దిగి తన వాహనంలోకి వెళ్లి కూర్చున్నారు. అనంతరం మిగతా వార్డుల్లో ప్రచారం కొనసాగించారు.
