బిజెపి ప్రస్తుతం అధికారంలో ఉన్న పార్టీ. 2024 ఎన్నికలను దృష్టిలో పెట్టుకుని తన ఎన్నికల ప్రచార వ్యూహాన్ని మార్చింది. ప్రతి పార్టీకి తన ప్రచార వ్యూహాల్ని మార్చుకునే హక్కు ఉంది, ఇందులో తప్పేమిటి అనొచ్చు. ఇక్కడ విషయం కేవలం ప్రచారం కాదు. ఆ ప్రచా రం...మీరు, నేను మన లాంటి ఎందరో జనాభా రకరకాలుగా కట్టిన టాక్సులతో చేసుకుంటున్నది. అంటే బిజెపి ప్రజల డబ్బుతో తన పార్టీ ప్రచారం చేసుకుంటున్నది. ఎలా..? ప్రభుత్వం వ్యవసాయదారులకు ఎరువులు సబ్సిడీపై ఇస్తుంది. ఇక్కడే ఉంది అసలు తిరకాసు. భారత ప్రభుత్వం ఒక జీవో విడుదల చేసింది. ఈ విషయం ఎక్కడా న్యూస్‌ ఛానెళ్లలో కానీ వార్తా పత్రికల్లో గాని వెలువడ లేదు. ఆ జీవో ప్రకారం సబ్సిడీలో ఎరువులు ఇచ్చే కంపెనీలు ఆ ఎరువుల బ్యాగులపై ఈ కింది విధమైన ప్రింటింగ్‌ ఉండాలని అనివార్యం చేసింది. ''భారతీయ-జన్‌ ఉర్వరక్‌-పరియోజన'' ఇప్పుడు చూడండి. ఈ పదాల మొదటి అక్షరాలను చదివితే ఏం వస్తుంది? భాజప అని. అలాగే ప్రభుత్వ దవాఖానాల్లో, పబ్లిక్‌ హెల్త్‌ సెంటర్లలో ఉచితంగా ఇచ్చే మందుల ప్యాకెట్లపై కూడా ''భారతీయ -జన ఔషధి -పరియోజన'' అని ఉండేలా ప్రింట్‌ చేయాలనీ ప్రభుత్వ ఆదేశాలు. అంతే కాదు. ఈ పదాలను అందంగా ఆకర్షణీయంగా ఉండాలని రంగుల్లో ముద్రిస్తున్నార నిపిస్తుంది. కాని, పై పదాల్లోని మొదటి మూడు అక్షరాలను భాజప జెండా వర్ణమైన కాషాయ వర్ణంలో ముద్రించి మిగిలిన అక్షరాలను ఇతర రంగుల్లో ఉండేలా చూస్తు న్నారు. అంటే ప్రభుత్వ సొమ్ముతో ఇక్కడ అంతర్లీనంగా బిజెపి ప్రచారం జరుగుతున్నది. మరో విషయమేమిటంటే సహజంగా ఎరువుల ఫ్యాక్టరీలు బస్తాలపై తమ కంపెనీ పేరుని ముద్రిస్తాయి. కాని ఇప్పుడు ఇచ్చిన జీవో ప్రకారం బస్తా క్షేత్రంలో ఏరియా 2/3 క్షేత్రం (ఏరియా)లో భారతీయ జన ఉర్వరక్‌ పరి యోజన అనే పదాలు ఉండాలని, మిగిలిన 1/3 వంతు భాగంలోనే కంపెనీ తమ పేరు ముద్రించుకోవాలనీ ఏలినవారి ఆదేశం !
ఇంతకు ముందు 'భారతీయ ఉర్వరక్‌ యోజన' అని ఉండేది. ఉర్వరక్‌ జన ఉర్వరక్‌ గాను యోజనని పరియోజనగాను మార్చి మొదటి మూడు అక్షరాలు పైనుంచి కిందికి చదివితే బిజెపి అని వచ్చేలా ఈ మార్పు చేశారు. ఇది పేరుకి ప్రభుత్వ ప్రచారం కానీ జరుగుతున్నది పార్టీ ప్రచారం. యోజన అంటే స్కీం. అదే పరియోజన అంటే ప్రాజెక్ట్‌. అర్థంలో మార్పేమీ లేదు, కానీ పరమార్ధం వేరుగా ఉంది !
సొమ్ము ప్రజలది, స్కీం ప్రభత్వానిది. కానీ సోకు (ప్రచారం) మాత్రం అధికార పార్టీది. చూడండి...ప్రజల డబ్బుని ప్రభుత్వం తమ పార్టీ ప్రచారానికి ఎలా ఉపయోగింస్తోందో..!
- పలకంశెట్టి జయప్రకాష్‌
