హైదరాబాద్‌ : ప్రముఖ సీనియర్‌ నటుడు చంద్రమోహన్‌ అంత్యక్రియలు నేటి మధ్యాహ్నం 12 గంటలకు పంజాగుట్ట స్మశానవాటికలో నిర్వహిస్తామని ఆయన కుటుంబ సభ్యులు తెలిపారు. నవంబర్‌ 11న చంద్రమోహన్‌ హైదరాబాదులోని ఒక ప్రైవేట్‌ ఆసుపత్రిలో చికిత్స పొందుతూ తుదిశ్వాస విడిచిన సంగతి విదితమే. చంద్రమోహన్‌ తుదిశ్వాస విడిచి ఇప్పటికే రెండు రోజులు అయిపోయిందని దీంతో తెలుగు ఫిలిం ఛాంబర్‌ దగ్గర ఆగకుండా ఇంటి నుంచి నేరుగా పంజాగుట్ట స్మశానవాటికకి ఆయన పార్థీవదేహాన్ని తరలిస్తారని కుటుంబ వర్గాలు చెప్పాయి. ఫిల్మ్‌ నగర్‌లోని చంద్రమోహన్‌ ఇంటి నుంచి ఉదయం 11 గంటలకు ఆయన అంతిమ యాత్ర ప్రారంభమవుతుందని కుటుంబ సభ్యులు తెలిపారు. చంద్రమోహన్‌ పార్థివదేహాన్ని ఇంటి నుంచి నేరుగా పంజాగుట్ట శ్మశానవాటికకు తీసుకెళతామని అన్నారు. చంద్రమోహన్‌ పెద్ద కుమార్తె అమెరికా నుంచి ఇప్పటికే హైదరాబాద్‌కు చేరుకున్నారు. ఆయన అంతిమ సంస్కారాలు చంద్రమోహన్‌ తమ్ముడు మల్లంపల్లి దుర్గాప్రసాద్‌ నిర్వహించనున్నారు. సినీపరిశ్రమలో చాలామంది ప్రముఖులు ఇప్పటికే చంద్రమోహన్‌ ఇంటికి వచ్చి నివాళులు అర్పించారని కుటుంబ సభ్యులు చెప్పారు.
