ప్రజాశక్తి-అమరావతి బ్యూరో : పాఠశాల విద్యార్థులకు ఈ నెల 24 నుంచి సమ్మెటివ్‌ అసెస్‌మెంట్‌ (ఎస్‌ఎ)-1 పరీక్షలు జరగనున్నాయి. ఈ మేరకు ఎస్‌సిఇఆర్‌టి డైరెక్టరు బి ప్రతాప్‌ రెడ్డి ప్రాంతీయ, జిల్లా విద్యాశాఖ అధికారులకు బుధవారం ఉత్తర్వులు జారీ చేశారు. 6 నుంచి 10వ తరగతి విద్యార్థులకు ఈ నెల 24 నుంచి డిసెంబరు 6 వరకు ఎస్‌ఎ-1 పరీక్షలు జరుగుతాయని వెల్లడించారు. 1 నుంచి 5వ తరగతి విద్యార్థులకు 25 నుంచి డిసెంబరు 2 వరకు ఉంటాయని పేర్కొన్నారు. అకడమిక్‌ కేలండరు ప్రకారం ఈ నెల 4 నుంచే ఎస్‌ఎ-1 పరీక్షలు జరగాల్సి ఉందని పేర్కొన్నారు. ఎన్‌సిఇఆర్‌టి ద్వారా 3, 6, 9 తరగతులకు చేపట్టిన స్టేట్‌ ఎడ్యుకేషన్‌ అచీవ్‌మెంట్‌ సర్వే (ఎస్‌ఇఎఎస్‌) అసెస్‌మెంట్‌ ఫ్రేమ్‌వర్క్‌, జాతీయ గ్రంథాలయ వారోత్సవాలు నేపథ్యంలో షెడ్యూల్‌ మారుస్తున్నట్లు తెలిపారు. ఈ నెల 14 నుంచి 20 వరకు గ్రంథాలయాల వారోత్సవాలు జరగనున్నాయని వివరించారు.
