ప్రజాశక్తి-విజయనగరం టౌన్‌ : డిసెంబర్‌ 15 నుంచి జనవరి 26 తేదీ వరకు 44 రోజులపాటు ఆడుదాం ఆంధ్ర పేరుతో క్రీడా పోటీలు నిర్వహిస్తామని జిల్లా క్రీడా అభివృద్ధి అధికారి, సెట్విజ్‌ సిఇఒ బి.రాంగోపాల్‌ తెలిపారు. మంగళవారం స్థానిక రాజీవ్‌ క్రీడా ప్రాంగణంలోగల డిఎస్‌ఎ కార్యాలయంలో ఏర్పాటు చేసిన విలేకరుల సమావేశంలో ఆయన ఆడుదాం ఆంధ్ర కార్యక్రమం వివరాలను తెలిపారు. రాష్ట్ర వ్యాప్తంగా రూ.50 కోట్లతో నిర్వహిస్తున్న ఆడుదాం ఆంధ్ర క్రీడా పోటీలు ఐదు క్రీడా అంశాల్లో జరుగుతాయన్నారు. సచివాలయం స్థాయి, మండల, నియోజకవర్గ, జిల్లా, రాష్ట్ర స్థాయిలో ఈ పోటీలు జరుగుతాయని తెలిపారు. 15ఏళ్లు పై బడిన వయసు కలిగిన స్త్రీ, పురుషుల విభాగాల్లో పోటీలు నిర్వహిస్తామన్నారు. ప్రధానంగా క్రికెట్‌, వాలీబాల్‌, కబడ్డీ, ఖోఖో, షటిల్‌ బ్యాడ్మింటన్‌ విభాగాల్లో పోటీలు ఉంటాయన్నారు. పోటీల్లో పాల్గొనే వారు తమ పేర్లను సచివాలయాల్లో ఈనెల 20 నుంచి డిసెంబర్‌ 10తేదీ లోపు నమోదు చేసుకోవాలన్నారు. జిల్లా స్థాయిలో విజేతలైన వారు విశాఖ పట్నంలో జనవరిలో జరగనున్న రాష్ట్ర పోటీల్లో పాల్గొంటారని తెలిపారు. సచివాలయం, మండల పరిధిలో విజేతలకు క్రీడా కోట్లు ఇస్తామన్నారు. నియోజకవర్గ స్థాయి లో క్రికెట్‌,వాలీబాల్‌, కబడ్డీ, ఖోఖో విజేతలకు రూ.35వేలు, రెండవ స్థానానికి రూ.15వేలు, మూడో స్థానంలో నిలిచిన జట్టుకు రూ.5వేలు క్యాష్‌ ప్రైజ్‌ ఇస్తామని తెలిపారు. జిల్లా స్థాయిలో విజేతకు రూ.60వేలు, రెండో స్థానానికి రూ.30వేలు, మూడో స్థానం జట్టుకు రూ.10వేలు అందజేస్తారని తెలిపారు. రాష్ట్ర పోటీల్లో విజేతకు రూ.5లక్షలు, రూ.3లక్షలు, రూ.2 లక్షలు ప్రైజ్‌ మనీగా ఇస్తారని తెలిపారు. అన్ని క్రీడల నిర్వహణకు మెటీరియల్‌ ఇస్తారని తెలిపారు. వ్యాయామ ఉపాధ్యాయులు సహకారంతో ఈ పోటీలు నిర్వహిస్తామని తెలిపారు. జిల్లాలో ప్రతి గ్రామంలో జరగనున్న పోటీల్లో జిల్లా ప్రజలంతా పాల్గొని విజయవంతం చేయాలని కోరారు. సమావేశంలో చీఫ్‌ కోచ్‌ అచ్యుతరావు, క్రీడా శిక్షకులు పాల్గొన్నారు.
