ప్రజాశక్తి-శృంగవరపుకోట : పాలస్తీనాకు మద్దతుగా జిల్లాలో పలు చోట్ల శుక్రవారం వామపక్షాల ఆధ్వర్యాన నిరసన చేపట్టారు. శృంగవరపుకోట పట్టణంలోని ఆర్‌టిసి కాంప్లెక్స్‌ వద్ద సిపిఎం ఆధ్వర్యాన ఆందోళన నిర్వహించారు ఈ సందర్భంగా సిపిఎం జిల్లా కార్యదర్శి తమ్మినేని సూర్యనారాయణ మాట్లాడుతూ గాజాపై నెల రోజులుగా ఇజ్రాయిల్‌ చేస్తున్న దాడులను వెంటనే ఆపాలన్నారు. ఈ దాడుల మూలంగా వేలాది మంది పిల్లలు, వృద్ధులు, మహిళలు మరణిస్తున్నారని ఆవేదన వ్యక్తంచేశారు. ఈ సమస్య పరిష్కారానికి మానవతా దృక్పథంతో ఇతర దేశాలతో పాటు ఇండియా కూడా ముందుకు రాకపోవడం పట్ల ఆందోళన వ్యక్తం చేశారు. ఐక్యరాజ్య సమితి చేసిన సూచనలను కూడా లెక్కచెయ్యకుండా దాడులు కొనసాగించడం అమానవీయమన్నారు. ఇజ్రాయిల్‌ దాడులు ఆపేలా ప్రధాని మోడీ కృషి చేయాలని, పాలస్తీనాకు మద్దతుగా నిలవాలని కోరారు. అమెరికా, జర్మనీ, బ్రిటన్‌.. ఇజ్రాయిల్‌ను రెచ్చగొట్టే ధోరణిని విడనాడాలన్నారు. కార్యక్రమంలో సిపిఎం మండల కార్యదర్శి మద్దిల రమణ, నాయకులు చెలికాని ముత్యాలు, శంకర్‌, ఎస్‌ఎఫ్‌ఐ నాయకులు హర్ష, క్వారీ యూనియన్‌ నాయకులు వై.భాస్కర్‌, పి.భాస్కర్‌ పాల్గొన్నారు.
విజయనగరంటౌన్‌ : పాలస్తీనా, గాజా పై ఇజ్రాయిల్‌ చేస్తున్న దాడులను సిపిఎం జిల్లా కార్యదర్శి వర్గ సభ్యులు రెడ్డి శంకరరావు, సిపిఐ నాయకులు నాగభూషన్‌ ఖండించారు ఆర్టీసీ కాంప్లెక్స్‌ వద్ద వామపక్షాల ఆధ్వర్యంలో శుక్రవారం నిరసన కార్యక్రమం చేపట్టారు. ఈ సందర్భంగా వారు మాట్లాడుతూ అమెరికా తన ఆధిపత్యం కోసం పాలస్తీనా, ఇజ్రాయిల్‌ దేశాల మధ్య జాత్యహంకార చిచ్చు రేపి యుద్ధానికి ఆద్యం పోసిందన్నారు. చిన్న పిల్లలను మహిళలను కూడా విడిచిపెట్టకుండా శరణార్థ శిబిరాల వద్ద బాంబుల వర్షం కురిపించి ప్రాణాలతీసేందుకు ఇజ్రాయిల్‌ కారణమైందన్నారు .ఈ దుశ్చర్యను ప్రపంచ దేశాలు ఐక్యరాజ్యసమితి కూడా ఖండిస్తున్న భారత ప్రధాని నోరు విప్పకపోవడం దారుణం అన్నారు .దాడులను ఆపాలని ప్రపంచశాంతి నెలకొల్పాలని ఆకాంక్షిస్తూ అమెరికాను, ఇజ్రాయిల్‌ ను హెచ్చరించాలని డిమాండ్‌ చేశారు. కార్యక్రమంలో సిపిఎం నాయకులు పి. రమణమ్మ, ఎ.జగన్మోహన్‌, రామమోహన్‌, బి.రమణ, ఎస్‌ఎఫ్‌ఐ నాయకులు వెంకటేష్‌, రామ్మోహన్‌, సిపిఐ నాయకులు రంగరాజు తదితరులు పాల్గొన్నారు.
రామభద్రపురం : గాజాపై ఇజ్రాయిల్‌ చేస్తున్న దాడులను వెంటనే ఆపాలని సిపిఎం మండల కార్యదర్శి బలస శ్రీను, సిపిఐ నాయకులు అలమండ ఆనంద రావు ఆధ్వర్యాన స్థానిక ఆర్‌టిసి కాంప్లెక్స్‌ వద్ద రాస్తారోకో నిర్వహించారు. కార్యక్రమంలో వామపక్ష నాయకులు, ప్రజలు పాల్గొన్నారు.
గజపతినగరం : గజపతినగరంలో వామపక్షాల ఆధ్వర్యాన మహాత్మా గాంధీ విగ్రహం వద్ద నిరసన తెలిపారు. ఈ సందర్భంగా సిపిఐ జిల్లా కార్యదర్శి ఒమ్మి రమణ, సిపిఎం జిల్లా కమిటీ సభ్యులు జి.శ్రీనివాస్‌ మాట్లాడుతూ పాలస్తీనాకు మద్దతుగా నిలవాలని ప్రజలను కోరారు. కార్యక్రమంలో సిపిఎం జిల్లా కార్యదర్శివర్గ సభ్యులు వి.లక్ష్మి, నాయకులు రాకోటి రాములు, సిపిఐ నాయకులు అప్పారావు, అప్పలనాయుడు, ఈశ్వరరావు, కనకరాజు, లక్ష్మణ తదితరులు పాల్గొన్నారు
బొబ్బిలి : పట్టణంలో దక్షిణ దేవుడి వద్ద వామపక్షాల ఆధ్వర్యాన నిరసన చేపట్టారు. సిపిఎం జిల్లా కార్యదర్శివర్గ సభ్యులు పి.శంకర్రావు మాట్లాడుతూ ఇజ్రాయిల్‌కు ప్రధాని మోడీ మద్దతు ఇవ్వడాన్ని ప్రజలందరూ ఖండించాలని కోరారు. కార్యక్రమంలో సిపిఐ నాయకులు ఎం.శ్రీనివాసరావు, పట్టణ కళాసీ సంఘం అడబాల అప్పారావు, సిపిఐ ఎంఎల్‌ న్యూడెమోక్రసీ నాయకులు శ్రీరామ్మూర్తి, తదితరులు పాల్గొన్నారు.
