ప్రజాశక్తి-విజయనగరంకోట : జిల్లా పోలీసుశాఖ ఆధ్వర్యంలో జిల్లా పోలీసు కార్యాలయంలో 'మైనారిటీస్‌ వెల్ఫేర్‌ డే' ను శనివారం ఘనంగానిర్వహించారు. స్పెషల్‌బ్రాంచి సిఐ ఇ.నర్సింహమూర్తి ముఖ్యఅతిథిగా హాజరై మౌలానా అబుల్‌ కలాం అజాద్‌ చిత్ర పటానికి పూలమాల వేసి నివాళులర్పించారు. అనంతరం మాట్లాడుతూ స్వాతంత్య్ర సమర యోధుడుగా, భారత ప్రభుత్వ తొలి విద్యాశాఖ మంత్రిగా మౌలానా అబుల్‌ కలాం అజాద్‌ 11ఏళ్లగా నిర్విరామంగా పని చేసి, జాతీయాభివృద్ధికి, విద్యారంగాన్ని బలోపేతంచేసేందుకు విశేషంగా కృషి చేసారన్నారు. అటువంటి మహనీయుని జన్మ దినాన్ని 'జాతీయ విద్యా దినోత్సవంగా, 'మైనారిటీస్‌ వెల్ఫేర్‌ డేగా నిర్వహించు కోవడం గొప్ప విషయమన్నారు. తొలి విద్యాశాఖామంత్రిగా మౌలానా అబుల్‌ కలాం అజాద్‌ దేశానికి చేసిన సేవలు చిరస్మరణీయమని అన్నారు. కార్యక్రమంలో ఆర్‌ఐలు రమణమూర్తి, ఎన్‌. గోపాల నాయుడు, ఎస్‌ఐ వాసుదేవ్‌, ఆర్‌.ఎస్‌.ఐలు నారాయణరావు, రామకృష్ణ, నీలిమ, ప్రసాదరావు, కేశవరావు తదితరులు పాల్గొన్నారు.
జిల్లా కాంగ్రెస్‌ కార్యాలయంలో..
మౌలానా అబుల్‌ కలాం జయంతినికాంగ్రెస్‌ కార్యాలయంలో నిర్వహించారు. డిసిసి అధ్యక్షులు సరగడ రమేష్‌ కుమార్‌, ఎపిసిసి మైనార్టీ వైస్‌ చైర్మన్‌ ఎమ్‌డి హస్సేన్‌ షరీఫ్‌ కలాం చిత్రపటానికి పూలమాలవేసి నివాళులర్పించారు. ఈ సందర్భంగా రమేష్‌కుమార్‌ మాట్లాడుతూ భారత ప్రభుత్వ తొలి ప్రధాని గౌరవ పండిట్‌ నెహ్రూ ,ఆయన లిమంత్రివర్గంలో విద్యా శాఖ మంత్రిగా కలాం పనిచేసి విశేష సేవలందించారని కొనియాడారు. కార్యక్రమంలో జిల్లా మైనారిటీ అధ్యక్షులు అబ్దుల్‌ రెహమాన్‌, సీనియర్‌ నాయకులు అబ్దుల్‌ ఖరీమ్‌, ఎస్‌.కె.సమీరా, ఖాజా, మక్బుల్‌ తదితరులు పాల్గొన్నారు.
బొబ్బిలి : స్థానిక కోరాడవీధిలో భారతరత్న మౌలానా అబుల్‌ కలాం ఆజాద్‌ జయంతిని శనివారం హుదా ముస్లిం వెల్ఫేర్‌ అసోసియేషన్‌ ఆధ్వర్యంలో ఘనంగా నిర్వహించారు. దేశ తొలి విద్యాశాఖ మంత్రిగా విద్యా అభివృద్ధికి ఆజాద్‌ చేసిన కృషిని అసోసియేషన్‌ సభ్యులు ప్రశంసించారు. ఆయన చిత్రపటానికి పూలమాలలు వేసి నివాళులర్పించారు.
శృంగవరపుకోట : మండలంలోని ధర్మవరం జిల్లా పరిషత్తు ఉన్నత పాఠశాలలో శనివారం మౌలానా అబుల్‌ కలామ్‌ ఆజాద్‌ జయంతిని నిర్వహించారు. ఆజాద్‌ చిత్రపటానికి పూలమాల వేసి నివాళులర్పించారు. కార్యక్రమంలో ఉపాధ్యాయులు రహీం షేక్‌ లాల్‌, ఎస్‌విఎస్‌ఎన్‌ మూర్తి, ఎ.సురేంద్రనాథ్‌ పాల్గొన్నారు.
చీపురుపల్లి : మండంలోని జి.అగ్రహారం గ్రంథాలయం ఆవరణలో ఆశయ యూత్‌ అసోసియేషన్‌, ఆశయ రూరల్‌ లైబ్రరీ ఆధ్వర్యంలో శనివారం జాతీయ విద్యా దినోత్సవాన్ని ఘనంగా నిర్వహించారు. ఈ సందర్భంగా భారతదేశ మొదటి విద్యా మంత్రి మౌలానా అబుల్‌ కలాం ఆజాద్‌ చిత్ర పటానికి నివాళులర్పించారు. ఈ కార్యక్రమంలో ఆశయ సంస్థ అధ్యక్షులు రెడ్డి రమణ, విద్యార్థులు, పాఠకులు తదితరులు పాల్గొన్నారు.
