ప్రజాశక్తి-విజయనగరం : జన విజ్ఞాన వేదిక ఆధ్వర్యాన జిల్లా వ్యాప్తంగా నిర్వహించిన చెకుముకి టాలెంట్‌ టెస్టుకు విశేష స్పందన లభించింది. జిల్లాలోని అన్ని మండల కేంద్రాల్లోగల ఉన్నత పాఠశాలల్లో నిర్వహించిన ఈ పరీక్షకు సుమారు 20వేల మంది విద్యార్థులు హాజరయ్యారని జెవివి జిల్లా అధ్యక్ష, ప్రధాన కార్యదర్శులు ఎంవిఎన్‌ వెంకటరావు, రమణప్రభాత్‌ తెలిపారు. పాఠశాల స్థాయిలో జరిగిన టాలెంట్‌ టెస్టులో 8,9,10 తరగతుల నుంచి ప్రథమస్థానంలో వచ్చిన వారిని మండలస్థాయికి ఎంపిక చేస్తారని తెలిపారు. మండలస్థాయి టాలెంట్‌ టెస్టు ఈనెల 30న, జిల్లా స్థాయిలో డిసెంబర్‌ 17, రాష్ట్రస్థాయిలో జనవరి 27,28 తేదీల్లో జరుగుతుందని తెలిపారు.
భోగాపురం : స్థానిక జెడ్‌పి ఉన్నత పాఠశాలలో 8,9,10 తరగతులకు చెందిన సుమారు వంద మంది విద్యార్థులు చెకుముకి టాలెంట్‌ టెస్టు రాశారు. తొలుత ప్రధానోపాధాయులు పిఎజిహెచ్‌ఎస్‌ శ్రీనివాసరావు, సైన్సు ఉపాధ్యాయులు కె.నాగలక్ష్మి, ఎం.శ్రీనివాస్‌, ఎస్‌.శ్రీదేవి చెకుముకి పరీక్షా పత్రాన్ని ఆవిష్కరించారు.
శాస్త్రీయ దృక్పథాన్ని పెంపొందించడమే లక్ష్యం
బొబ్బిలి : విద్యార్థుల్లో శాస్త్రీయ దృక్పథాన్ని పెంపొందించడమే లక్ష్యంగా జనవిజ్ఞాన వేదిక ఆధ్వర్యాన చెకుముకి పోటీలు నిర్వహిస్తున్నట్లు జెవివి జిల్లా ఉపాధ్యక్షులు పి.సత్యంనాయుడు తెలిపారు. ప్రపంచ సైన్స్‌ దినోత్సవం పురస్కరించుకొని జనవిజ్ఞాన వేదిక ఆధ్వర్యంలో 8, 9, 10 తరగతుల విద్యార్థులకు చెకుముకి సైన్స్‌ టాలెంట్‌ టెస్ట్‌ను నియోజకవర్గ పరిధిలోని బొబ్బిలి మండలం, పట్టణం, రామభద్రపురం, బాడంగి, తెర్లాం మండలాల్లో ప్రభుత్వ, ప్రయివేటు పాఠశాలల్లో శుక్రవారం నిర్వహించారు. ఈ సందర్భంగా ఆయన మాట్లాడుతూ విద్యార్థులు నిరంతరం ప్రశ్నించే లక్షణాలను కలిగి ఉండాలని, అన్ని పనులకు శాస్త్రీయతే కీలకమైనదని అన్నారు. పాఠశాల స్థాయిలో ప్రథమ స్థానం వచ్చిన విద్యార్థులు మండల, జిల్లా, రాష్ట్ర స్థాయిలో టాలెంట్‌ టెస్ట్‌లో పాల్గొనే అవకాశం ఉందన్నారు. నియోజకవర్గంలో 5 వేల మంది విద్యార్థులు టాలెంట్‌ టెస్ట్‌లో పాల్గొన్నారని తెలిపారు. బొబ్బిలి మండలం, పట్టణంలో 22 పాఠశాలల నుండి 2 వేల మంది పాల్గొన్నారని చెప్పారు. కార్యక్రమంలో జెవివి నాయకులు ఆనెం శ్రీనివాస్‌, శంబంగి శ్రీనివాస్‌, కృష్ణదాసు, సత్యనారాయణ పాల్గొన్నారు.
బాడంగి : స్థానిక జిల్లా పరిషత్‌ ఉన్నత పాఠశాలలో జన విజ్ఞాన వేదిక ఆధ్వర్యంలో చెకుముకి సైన్స్‌ సంబరాలు నిర్వహించారు. పాఠశాల స్థాయిలో 8,9,10 తరగతుల విద్యార్థులకు ప్రతిభా పరీక్ష నిర్వహించారు. కార్యక్రమంలో ఇన్‌ఛార్జి హెచ్‌ఎం తెంటు వెంకటలక్ష్మి, ఉపాధ్యాయులు ఎస్‌.సత్యనారాయణ, కె.ఈశ్వరరావు, డి.రమేష్‌, ఎస్‌.రామారావు, ఐవి.ప్రసాద్‌, రామారావు, గోవిందరావు పాల్గొన్నారు.
కొత్తవలస : మండలంలో పలు పాఠశాలల్లో చెకుముకి సైన్స్‌ టాలెంట్‌ టెస్ట్‌ను శుక్రవారం నిర్వహించారు. ఏడు పాఠశాలల్లో నిర్వహించిన పరీక్షకు 510 మంది హాజరైనట్లు జనవిజ్ఞాన వేదిక మండల కన్వీనర్‌ ఎల్‌.సత్యారావు తెలిపారు.
