తెలుగు చిత్రసీమలో చాలా మంది నటులు హీరోలుగా ఓ మంచి గుర్తింపు తెచ్చుకుని, ఆ తర్వాత అమాంతం తెరమరుగైన వారు చాలా మంది ఉన్నారు. అలా తెరమరుగై సెకండ్‌ ఇన్నింగ్స్‌తో మరోసారి తమ సత్తా చాటినవారూ ఉన్నారు. అలాంటి వారిలో ఒకరు వేణు తొట్టెంపూడి. ఈ పేరు గుర్తించి, పెద్దగా పరిచయం అవసరం లేదు. 'స్వయంవరం' 'చిరునవ్వుతో', 'హనుమాన్‌ జంక్షన్‌'లాంటి హిట్‌ చిత్రాల్లో నటుడిగా తానేంటో నిరూపించుకున్నారు. దాదాపు ఎనిమిదేళ్ల విరామం తర్వాత రవితేజ హీరోగా నటించిన 'రామారావు ఆన్‌ డ్యూటీ'లో కీలకపాత్రతో రీఎంట్రీ ఇస్తున్నారు. ఈ చిత్రం ప్రమోషన్స్‌లో భాగంగా ఓ ఇంటర్వ్యూలో ఆయన పంచుకున్న పలు ఆసక్తిర విషయాలు..
తొలి ప్రయత్నంలోనే హిట్‌ కొట్టారు వేణు తొట్టెంపూడి. ఆ తర్వాత 'చిరునవ్వుతో, గోపిగోపిక.. గోదావరి' వంటి చిత్రాల్లో లీడ్‌ రోల్‌ పోషించిన ఆయన.. తనదైన శైలిలో ఫిలాసఫీి డైలాగ్‌లు చెబుతూ ప్రత్యేక గుర్తింపు తెచ్చుకున్నాడు. ఇక 'హనుమాన్‌ జంక్షన్‌, పెళ్లాం ఊరెళితే, ఖుషి ఖుషిగా' వంటి సినిమాల్లో సహనటుడిగా కామెడీ పండిస్తూ ప్రేక్షకలును ఆకట్టుకున్నారు. అలా హీరోగా, కమెడియన్‌గా తన నటనతో తెలుగు ప్రేక్షకులను అలరించిన ఆయన కొంతకాలంగా సినిమాలకు దూరమయ్యాడు. చివరిగా 'దమ్ము, రామాచారి' చిత్రాల్లో కనిపించిన ఆయన ఆకస్మాత్తుగా తెరపై కనుమరుగయ్యారు. దాదాపు ఎనిమిదేళ్ల తర్వాత వేణు 'రామారావు ఆన్‌డ్యూటీ' మూవీతో రీఎంట్రీ ఇస్తున్నారు. ఇటీవల ఈ చిత్రంలోని వేణు ఫస్ట్‌లుక్‌ను మేకర్స్‌ రిలీజ్‌ చేసిన సంగతి తెలిసిందే. ఇందులో సీఐ మురళిగా కనిపించనున్నారు. ఈ నేపథ్యంలో వేణు సోషల్‌ మీడియా వేదికగా ఓ ఛానల్‌తో ముచ్చటించాడు. ఇందుకు సంబంధించిన వీడియోను 'రామారావు ఆన్‌డ్యూటీ' మేకర్స్‌ ఎస్‌ఎల్‌వీ సినిమాస్‌ తమ ఇన్‌స్టాగ్రామ్‌ ఖాతాలో షేర్‌ చేశారు.
సినిమాలకే మొదటి ప్రాధాన్యత..
'నేనెప్పుడూ సినిమాలకే మొదటి ప్రాధాన్యత ఇస్తా. చాలా రోజుల తర్వాత మళ్లీ నటించడం ఆనందంగా ఉంది. అనివార్య కారణాల వల్ల నటనకు దూరంగా ఉన్నా. మళ్లీ 'రామారావు ఆన్‌డ్యూటీ'తో రావడం ఆనందంగా ఉంది. ఈ సినిమాలో సీఐ మురళిగా కనిపిస్తాను. దీనికి సంబంధించిన పోస్టర్‌ కూడా విడుదలైన విషయం తెలిసిందే. ప్రస్తుతం 'రామారావు ఆన్‌డ్యూటీ'తో పాటు 'పారా హుషార్‌' అనే మరో సినిమాలో కీలక పాత్ర చేస్తున్నాను' అని చెప్పుకొచ్చాడు.
అసలు నటించనని చెప్పా..
'మొదట ఈ మూవీలో నటించమని దర్శకుడు శరత్‌ మండవ చాలాసార్లు ఫోన్‌ చేశారు. కానీ నేను ఒప్పుకోలేదు. అసలు నటించనని చెప్పాను. మీరు ఈ సినిమాలో నటించకపోయినా ఫర్వాలేదు. కానీ ఓసారి కలుద్దాం' అని మెసేజ్‌ చేశారు. దీంతో ఓసారి మీట్‌ అయ్యాం. ఆ ముచ్చట్లలో భాగంగా ఈ చిత్రంలోని మీ పాత్రను ఇలా అనుకుంటున్నా. మీకు నమ్మకం ఉంటే చేయండి అన్నారు. నాకూ ఆ పాత్ర నచ్చింది. రెండు మూడుసార్లు శరత్‌తో నా పాత్రపై చర్చించి, ఒకే చేశా. అంతకుముందు కూడా పలు కథలు విన్నాను. కానీ, అనుకోకుండా ఇది ఫైనల్‌ అయ్యింది' అని వేణు తెలిపాడు.
నేర్చుకున్నది తక్కువ.. నేర్చుకోవాల్సింది చాలా..
'నా జీవితం మొత్తం ప్రయాణాలే. అందుకు కారణం మా నాన్నగారు ప్రొఫెసర్‌ కావడమే. ఆయన బదిలీల కారణంగా తిరగాల్సి వచ్చేది. నాకు చిన్నప్పుడే సినిమాలపై ఆసక్తి కలగడానికి కారణం.. సినిమాకి హద్దులు లేవని నిరూపించినవి రెండు సినిమాలు. అప్పట్లో మధురైలో ఆ రెండూ వంద రోజులకు పైగా ఆడాయి. ఒకటి 'శంకరాభరణం'. రెండోది 'డిస్కో డ్యాన్సర్‌'. నాన్నగారు చాలా స్ట్రిక్ట్‌. ఆ రోజుల్లోనే కేంబ్రిడ్జ్‌ యూనివర్శిటీలో చదివారు. నన్ను చేయి పట్టుకుని తీసుకెళ్లి 'శంకరాభరణం' చూపించి 'సినిమా అంటే ఇది' అని చెప్పారు. నాకు రెండు, మూడుసార్లు చూడగా అందులోని విషయం అర్థమైంది. ఇంకా నా ఫ్రెండ్‌తో కలిసి 'డిస్కో డ్యాన్సర్‌' చూశా. రెండూ కళ గురించి చెప్పేవైనా విరుద్ధ విధానాల్లో సాగే సినిమాలు. రెండింటినీ ప్రేక్షకులు విజయవంతం చేశారు. అక్కడి నుంచి నేనూ విపరీతంగా సినిమాలు చూసేవాడిని. చాలాసార్లు నా సినిమా పిచ్చి తట్టుకోలేక మా నాన్న కొట్టారు. ఆ తర్వాత సుమారుగా పాతిక సినిమాల్లో హీరోగా నటించా. నేర్చుకున్నది చాలా తక్కువ. నేర్చుకోవాల్సింది చాలా ఉందని తెలుసుకున్నా. అందుకే మీ ముందుకి మళ్లీ వచ్చా. లాక్‌డౌన్‌లో వేరే భాషకి చెందిన సినిమాలు, వెబ్‌సిరీస్‌లు విపరీతంగా చూశా. నటనకు ఆస్కారం ఉన్న పాత్రలో నటించాలని అప్పుడు అనిపించింది. వాటి నుంచి స్ఫూర్తి పొందా. ప్రత్యేక గుర్తింపు ఉన్న పాత్రలే చేయాలని నిర్ణయించుకున్నా. అది ఈ చిత్రంతో తీరింది.
ఆ రెండు సినిమాలూ మిస్సయ్యా..
నాకు చాలా బిడియం. మంచి సినిమాలు చేయాలన్న కోరిక ఉన్నా, నాకు ఎటువంటి పరిచయాలు లేకపోవటం, నేనెవర్నీ కలవకపోవటం నా గ్యాప్‌కి కారణం. నిజం చెప్పాలంటే నా ప్రయత్న లోపమే. కంఫర్ట్‌ జోన్‌ లేకపోతే నేను సినిమాలు చేయలేను. అందుకే రెండు హిట్‌ సినిమాలు మిస్సయ్యా.. 'ఇట్లు శ్రావణి సుబ్రమణ్యం', 'దేశముదురు'. ఈ రెండు కథలను నాతో డిస్కస్‌ చేశారు. ముఖ్యంగా నాకు 'దేశముదురు' స్టోరీ బాగా నచ్చింది. దాని గురించి అశ్వనీదత్‌, ఈవీవీ కాంబినేషన్‌లో ఓ సినిమా చేయాల్సి ఉన్నా వదులుకున్నా. కానీ, ఆ సినిమాలు నాతో జరగలేదు. మరోవైపు అశ్వనీదత్‌-ఈవీవీ మూవీ కూడా పట్టాలెక్కలేదు.
పేరు : వేణు తొట్టెంపూడి
పుట్టిన తేదీ : జూన్‌ 4, 1976
పుట్టిన ప్రాంతం : కాకినాడ, ఏపీ
నివాస ప్రాంతం : హైదరాబాద్‌
చదువు : ఇంజనీరింగ్‌
భార్య : అనుపమ చౌదరి
