టాలీవుడ్లోకి వెంకటాద్రి ఎక్స్‌ప్రెస్‌ చిత్రంతో హీరోయిన్‌గా ఎంట్రీ ఇచ్చారు రకుల్‌ ప్రీత్‌సింగ్‌. ప్రస్తుతం వరుస సినిమాలు చేసుకుంటూ ఇండిస్టీలో ఎవరూ అందుకోలేనంత వేగంతో దూసుకెళ్తున్నారు. తెలుగుతో పాటు హిందీ తదితర భాషల్లోనూ నటిస్తూ ఆయా ఇండిస్టీలలో సత్తా చాటుతున్నారు. ఈ మధ్య ఒక కార్యక్రమంలో పాల్గొన్న ఆమె ఆడపిల్లల రక్షణ కోసం ప్రతి ఒక్కరూ పాటుపడాలని, భ్రూణ హత్యలు చట్టరీత్యా నేరమని, అలాంటి వారిని కఠినంగా శిక్షించాలి అంటూ పిలుపునిచ్చారు. రకుల్‌ గురించి మరిన్ని విశేషాలు..
పూర్తిపేరు : రకుల్‌ ప్రీత్‌సింగ్‌
స్వస్థలం : ఢిల్లీ
చదువు : బీఎస్సీ (మ్యాథమెటిక్స్‌)
తొలిగుర్తింపు : మిస్‌ ఇండియా పోటీలో ప్రజాభిప్రాయం
ద్వారా 'మిస్‌ ఇండియా'గా ఎంపికయ్యారు
తెలుగులో తొలిసారి : కెరటం, గుర్తింపు తెచ్చిన చిత్రం
వెంకటాద్రి ఎక్స్‌ప్రెస్‌
నటించే భాషలు : తెలుగు, తమిళ్‌, కన్నడ, హిందీ
ఇతర రంగాల్లో : జాతీయ స్థాయి గోల్ఫ్‌ క్రీడాకారిణిని
హాబీలు : క్రమం తప్పకుండా స్విమ్మింగ్‌, బాస్కెట్‌బాల్‌,
టెన్నిస్‌ సాధన
నచ్చే సెలబ్రిటీలు : షారుక్‌ ఖాన్‌, సైనా నెహ్వాల్‌
'ఆడపిల్లల రక్షణ కోసం ప్రతి ఒక్కరూ పాటుపడాలి. లింగ నిర్ధారణ ద్వారా భ్రూణ హత్యలు చేయడం చట్టరీత్యా నేరం. లింగ నిర్ధారణకు సహకరించే వారినీ కఠినంగా శిక్షించాలి. కడుపున పుట్టిన బిడ్డల్లో తల్లిదండ్రులు తేడాలు చూపడం చాలా బాధాకరమైన విషయం. అమ్మాయి, అబ్బాయి ఇద్దరూ సమానమే. కాబట్టి ఇద్దరికీ సమాన స్వేచ్ఛ ఇవ్వాల్సిన బాధ్యత తల్లిదండ్రులపై ఉంది. మహిళల అక్రమ రవాణా నివారించడంతో పాటు బాల్య వివాహాలను నిర్మూలించేందుకు అందరూ కృషి చేయాలి. అంతేకాదు కట్నం తీసుకునే వారిపైనా చట్టరీత్యా చర్యలు తీసుకోవాలి' అని ఓ కార్యక్రమంలో పాల్గొన్న రకుల్‌ ప్రీతిసింగ్‌ అన్నారు.
బోల్డ్‌ పాత్రలో..
రకుల్‌ కొందరి హీరోయిన్లలా కాకుండా విభిన్న పాత్రలు ఎంచుకుంటూ ఇండిస్టీలో టాప్‌ హీరోయిన్‌గా రాణిస్తున్నారు. తాజాగా 'చత్రీవాలి' సినిమాలో కండోమ్‌ టెస్ట్‌ చేసే ఓ అమ్మాయి రోల్‌లో నటించేందుకు ఆమె ఓకే చెప్పారు. ఈ నేపథ్యంలో రకుల్‌ దానిపై మరింత క్లారిటీ ఇచ్చారు. 'మనం ఎలా పుడుతున్నామో ప్రతి ఒక్కరికీ తెలుసు. అయితే ఆ విషయాన్ని ప్రస్తావించడానికి సిగ్గుపడుతూ ఉంటాం. అదే విషయాన్ని ''చత్రీవాలి'' సినిమా ద్వారా అందరూ తెలుసుకోవాలి. అలాగని అందులో నా పాత్ర అసభ్యకరమైన సన్నివేశాలతో ఉండదు. ఇది ఒక చిన్న పట్టణం నుంచి వచ్చి.. కండోమ్‌ టెస్టర్‌ క్వాలిటీ హెడ్‌గా మారిన ఓ అమ్మాయి కథ. ఇలాంటి బోల్డ్‌ పాత్రలో నటించాలంటే ప్రతి ఒక్క నటికీ పెద్ద సవాలే. వాస్తవానికి ఇలాంటి పాత్రలు చేస్తే కెరీర్‌ పరంగా కొంచెం ఇబ్బంది ఎదురయ్యే అవకాశం ఉంటుంది. అయితే ఇలాంటి అవకాశాలు అరుదుగా వస్తాయి. అందుకే ఈ క్యారెక్టర్‌ని చేయాలని నిర్ణయించుకున్నా. ఈ సినిమాలో నటించడానికి ఓకే చెప్పేముందు మా తల్లిదండ్రులను అడిగాను. వాళ్లు చెయ్యమని ఎంకరేజ్‌ చేశారు' అంటున్నారు రకుల్‌.
బిజినెస్‌ ఉమెన్‌గా..
రకుల్‌ ఇప్పటికే సొంతంగా హైదరాబాద్‌లో పలు ఫిట్‌నెస్‌ సెంటర్లని నిర్వహిస్తున్నారు. ఇప్పుడు మరోకొత్త రంగంలోకి అడుగుపెట్టారు. గ్రామీణ ప్రాంతాల నుంచి ముంబై, హైదరాబాద్‌, చెన్నైలాంటి నగరాలకు సినిమా అవకాశాల కోసం వచ్చేవారికి 'ఆడిషనింగ్‌' ప్రక్రియతో యాక్సెస్‌ అంత సులభంగా దొరకడం లేదు. దీంతో చాలామందికి సిల్వర్‌ స్క్రీన్‌ ఆశలు ఉన్నా.. అవి అడియాశలుగానే మిగిలిపోతున్నాయి. అలాంటి వారికోసం 'స్టారింగ్‌ యూ' స్టార్టప్‌తో ముందుకు వచ్చారు రకుల్‌. తమ్ముడు అమన్‌తో కలిసి స్టారింగ్‌ యూ అనే వెబ్‌సైట్‌/యాప్‌ని ఆమె ప్రారంభించారు. మూవీ సెక్టార్‌కి సంబంధించి 24 క్రాఫ్ట్‌లలో అనుభవం ఉన్నవారు ఈ యాప్‌ ద్వారా తమ డ్రీమ్స్‌ నెరవేర్చుకునేందుకు ట్రై చేయొచ్చు. తెలుగు, తమిళ, హిందీ పరిశ్రమకు చెందిన ప్రముఖ స్టూడియోలు, నిర్మాణ సంస్థలతో స్టారింగ్‌ యూ ఒప్పందం చేసుకుంది. జాబ్‌ సీకర్స్‌ కోసం ప్రత్యేకంగా నౌకరీ.కామ్‌, మాన్‌స్టర్‌.కామ్‌ వంటి పోర్టల్స్‌, యాప్స్‌ వచ్చాయి. రెజ్యూమ్‌ అప్‌లోడ్‌ చేస్తే చాలు.. కంపెనీల నుంచి ఆహ్వానాలు అందుతాయి. ఇటు ఉద్యోగార్థులకు, అటూ కంపెనీలకు ఈ వెబ్‌సైట్లు ఎంతో ఉపయోగకరంగా ఉన్నాయి. సినిమా ఇండిస్టీకి సంబంధించి 'స్టారింగ్‌ యూ' కూడా అదే పని చేయనుంది.
వినోదాత్మక కథలకు మంచి స్పందన
'కొంతకాలం క్రితం ప్రాంతీయ సినిమాలకు ప్రేక్షకుల ఆదరణ కొంతవరకే పరిమితమయ్యేది. అయితే పాన్‌ ఇండియన్‌ మూవీ బిజినెస్‌ విషయంలో 'బాహుబలి' అన్ని కోణాల్లో కొత్త దారులను చూపించింది. ఇప్పుడు సినిమాల మధ్య ఉన్న భాషా పరమైన హద్దులూ చెరిగిపోయాయి. మంచి కంటెంట్‌కు ఆదరణ పెరుగుతోంది. ఓటీటీ ప్లాట్‌ఫామ్స్‌ వల్ల ఇప్పుడు మంచి ప్రాంతీయ సినిమాలను ప్రపంచవ్యాప్తంగా సినిమా ప్రేక్షకులు చూసే అవకాశం కలుగుతోంది. ఆసక్తిగా సాగే వినోదాత్మక కథలకు వ్యూయర్స్‌ నుంచి ఎప్పుడూ మంచి స్పందన ఉంటుంది. డిజిటల్‌ ప్లాట్‌ఫామ్స్‌లో షో లేదా వెబ్‌సిరీస్‌లు చేయడానికి నేను సిద్ధంగానే ఉన్నాను. కానీ ఆ స్టోరీ నన్ను ఎగ్జైట్‌ చేయడంతో పాటు, నా పాత్ర కథను నడిపించేలా ఉండాలి' అంటున్నారు రకుల్‌. రకుల్‌ నటించిన ఏడు సినిమాలు ఈ ఏడాది రిలీజుకు సిద్ధంగా ఉన్నాయి. వాటిలో ఆరు హిందీ, ఒకటి తెలుగు చిత్రం. ఆల్‌ ది బెస్ట్‌ రకుల్‌.
