సోషల్‌ మీడియా అనగానే మనలో చాలామంది దానికి ప్రతికూలంగా స్పందిస్తాం. తప్పుడు వార్తలు, ట్రోలింగ్‌, ద్వేషం ఇలాంటివే మనకు గుర్తుకొస్తాయి. అయితే.. సోషల్‌ మీడియాలో మంచి కూడా ఉందంటోంది అంటుంది బాలీవుడ్‌ హీరోయిన్‌ అనన్యపాండే. సినీ నేపథ్యమున్న కుటుంబం నుంచి పరిచయమైన నటి అనన్య పాండే సీనియర్‌ యాక్టర్‌ చుంకీ పాండే కుమార్తె. అనన్య చిన్న వయసులోనే సినిమాల్లోకి వచ్చి, ఎనలేని గుర్తింపును దక్కించుకుంది. ఫలితంగా వరుసగా సినిమాలు చేస్తూ దూసుకెళ్తోంది. ఈ క్రమంలోనే తాజాగా సోషల్‌ మీడియాపై తనకున్న అభిప్రాయాన్ని పంచుకుంది. సామాజిక మాధ్యమ దినోత్సవం సందర్భంగా కొత్త కార్యక్రమానికి శ్రీకారం చుట్టింది. మహమ్మారి కరోనా కష్టకాలంలో ప్రజలకు సేవలందించిన వారితో లైవ్‌లో ముచ్చటించింది.
పుట్టిన తేదీ : 30 అక్టోబర్‌, 1998
నివాస ప్రాంతం : ముంబై
తల్లిదండ్రులు : చుంకీపాండే, భావనా పండే
హాబీస్‌ : ట్రావెలింగ్‌, డాన్సింగ్‌
సోదరి : రిసా పాండే
ఇష్టమైన ఆహారం : చాక్లెట్లు, పిజ్జా
అనన్య పాండే భారతీయ సినీ నటి, మోడల్‌. పునిత్‌ మల్హోత్రా దర్శకత్వం వహించిన 2019 టీన్‌ డ్రామా స్టూడెంట్‌ ఆఫ్‌ ది ఇయర్‌ 2 ద్వారా అనన్య బాలీవుడ్‌లోకి అడుగుపెట్టింది. ప్రస్తుతం విజరు దేవరకొండ సరసన లైగర్‌ సినిమాతో అనన్య తెలుగు సినిమా రంగంలో అడుగుపెట్టనుంది. జూన్‌ 30న సామాజిక మాధ్యమ దినోత్సవం సందర్భంగా ఆమె ఒక కార్యక్రమానికి శ్రీకారం చుట్టింది. ఇందులో భాగంగా కరోనా సమయంలో సమాజ సేవ చేసి, రియల్‌ హీరోలుగా నిలిచిన వారితో ఆమె ప్రత్యేకంగా ముచ్చటించనుంది. ఈ విషయాన్ని తెలియజేస్తూ.. ఆమె ఇన్‌స్టాగ్రామ్‌లో ఒక పోస్టు చేసింది.
'మనం సోషల్‌ మీడియాలో ప్రతికూల భాగాన్నే చూస్తాం. దాని గురించే మాట్లాడతాం. నేను మాత్రం కరోనా సమయంలో కొంతమంది మనవత్వాన్ని సోషల్‌ మీడియాలో చూశాను. ఎటువంటి పరిచయం లేని వాళ్లకు సాయం చేయడం.. సమాచారం పంచుకోవడం గొప్ప విషయం. ఇలా ఎన్నో రకాలుగా ఎంతోమంది ప్రాణాలు సోషల్‌ మీడియా ద్వారా కాపాడుకోగలిగాం. ఇవన్నీ సోషల్‌ మీడియాపై నాకు మరింత నమ్మకాన్ని కలిగించాయి. అందుకే ''సోషల్‌ మీడియా ఫర్‌ సోషల్‌ గుడ్‌'' అనే ఒక సిరీస్‌ చేయాలని నిర్ణయించుకున్నాను. ఇందులో భాగంగా నేను కొంతమంది సోషల్‌ మీడియా హీరోలతో మాట్లాడబోతున్నాను' అని ఆమె రాసుకొచ్చింది. కాగా.. అనన్య వస్త్రధారణ విషయంలో గతంలో సోషల్‌ మీడియాలో ట్రోలింగ్‌ను ఎదుర్కోవడం గమనార్హం. దానిపై స్పందించిన ఆమె 'నేను ఏ దుస్తులు ధరించినా నెటిజన్లు ట్రోలింగ్‌ చేస్తూనే ఉంటారు. ట్రోలింగ్‌ గురించి పట్టించుకోకుండా నా సౌకర్యం, సంతోషానికే ప్రాధాన్యతనిస్తాను' అని అనన్య ఓ ఇంటర్వ్యూలో స్పష్టం చేసింది.
మొదటి సినిమాతోనే గుర్తింపు..
చిన్న వయసులోనే 'స్టూడెంట్‌ ఆఫ్‌ ది ఇయర్‌ 2' అనే సినిమా ద్వారా అనన్య పాండే హీరోయిన్‌గా పరిచయమైంది. పునిత్‌ మల్హోత్రా దర్శకత్వం వహించిన ఈ మూవీలో టైగర్‌ ష్రాఫ్‌ హీరోగా నటించగా.. తారా సుతారియా ప్రధానపాత్రను పోషించింది. ఈ చిత్రం సూపర్‌ డూపర్‌ హిట్‌ అయింది. అలాగే, అనన్య పాండేకు ప్రశంసలు దక్కడంతో పాటు ఎన్నో అవార్డులను తెచ్చి పెట్టింది.
తక్కువ చిత్రాలకే ఎక్కువ పాపులర్‌
ఫస్ట్‌ మూవీనే సూపర్‌ హిట్‌ అవడంతో గ్రాండ్‌ ఎంట్రీని అందుకుంది అనన్య. ఈ చిత్ర ఫలితంతో ఆమెకు వరుసగా ఆఫర్లు వచ్చాయి. అయితే, పాత్రకు ప్రాధాన్యం ఉన్న వాటినే చేస్తూ వస్తోంది. ఈ క్రమంలోనే ఇప్పటికీ 'పతీ పత్నీ ఔర్‌ వో', 'అంగ్రేజీ మీడియం', 'ఖాలీ పీలీ' అనే చిత్రాల్లో నటించింది. ఈ అన్నింట్లోనూ తన నటనతో మెప్పించింది.
బాలీవుడ్‌ టు టాలీవుడ్‌...
బాలీవుడ్‌లో 'స్టూడెంట్‌ ఆఫ్‌ ది ఇయర్‌2' తో కెరీర్‌ను ప్రారంభించిన ఈ ముంబయి నటి తెలుగులోనూ సందడి చేసేందుకూ సిద్ధమైంది. టాలీవుడ్‌లోకి ఎంట్రీ ఇస్తున్న అనన్య టాలీవుడ్‌ స్టార్‌ హీరో విజరు దేవరకొండ - డైనమిక్‌ డైరెక్టర్‌ పూరీ జగన్నాథ్‌ కాంబినేషన్‌లో వస్తోన్న చిత్రం 'లైగర్‌'లో నటిస్తోంది. పాన్‌ ఇండియా రేంజ్‌లో రాబోతున్న ఈ సినిమాని కరణ్‌ జోహార్‌ సమర్పణలో పూరీ, చార్మీ సంయుక్తంగా నిర్మిస్తున్నారు. ఈ చిత్రం ద్వారా అనన్య పాండే తెలుగు సహా దక్షిణాది భాషలన్నింట్లోకి ఎంట్రీ ఇవ్వబోతుంది. మదర్‌ సెంటిమెంట్‌కు బాక్సింగ్‌ క్రీడా నేపథ్యాన్ని జోడిస్తూ తెరకెక్కిస్తున్న ఈ సినిమా చిత్రీకరణ దాదాపు పూర్తి కావచ్చింది. త్వరలోనే ప్రేక్షకుల ముందుకు రానుందీ చిత్రం. పేరు : అనన్య పాండే
