భూసేకరణలో కేరళ విధానం ప్రజా పక్షంగా ఉంది : సిపిఎం మహారాష్ట్ర కార్యదర్శి ఉదయ్ నార్కర్

మహారాష్ట్రలో బుల్లెట్‌ రైలు ప్రాజెక్టు కోసం భూములు కోల్పోతున్న వేలాది మంది గిరిజనులకు కేంద్రం పరిహారం, భూమి భర్తీ చేయడం లేదని సీపీఎం మహారాష్ట్ర రాష్ట్ర కార్యదర్శి ఉదయ్  నార్కర్‌ అన్నారు. ''ప్రజలు ఇళ్ల నుంచి వెళ్లగొట్టబడుతున్నారు. దానికి వ్యతిరేకంగా పోరాటం జరుగుతోంది. కానీ కేరళలో అభివృద్ధి అంటే ప్రజలను కలిసి ఉంచడమే. భూసేకరణ ద్వారా తగిన పరిహారం, పునరావాసం కల్పిస్తామని వామపక్ష ప్రభుత్వం స్పష్టమైన భరోసా ఇస్తోంది.'' అని ఆయన అన్నారు. పార్టీ మహాసభలకు హాజరైన సందర్భంగా ఆయన ప్రజాశక్తితో మాట్లాడారు.

''మహారాష్ట్రతో పాటు అనేక ఇతర రాష్ట్రాల్లో ప్రాజెక్టుల కోసం భూమిని సేకరించినప్పుడు భూ యజమానులకు పరిహారం సరిగ్గా అందడం లేదు. ప్రాజెక్టులు అమలు చేసేటప్పుడు ప్రజల సామాజిక, ఆర్థిక, పర్యావరణ, సాంస్కృతిక అంశాలను విశ్లేషించాలి. కేరళలో సిల్వర్‌లైన్‌ ప్రాజెక్టు విషయంలో ఈ పద్ధతి అమలు చేస్తున్నారు. ప్రభుత్వం మెరుగైన పరిహారం అందజేస్తుంది. ముంబై -అహ్మదాబాద్‌ బుల్లెట్‌ రైలు ప్రాజెక్టు అమల్లో మాత్రం ఇలాంటి అవగాహనే కనపడకుండా పోయింది. కేరళలోని ఎల్‌డిఎఫ్‌ ప్రభుత్వాన్ని ప్రజలు 'మా ప్రభుత్వం' అని పిలుచుకునేలా కనిపిస్తోంది. భారీ ఆదాయం ఉన్నప్పటికీ మహారాష్ట్ర ఆరోగ్యం, విద్య సహా అన్ని సూచికల్లో కేరళ కంటే చాలా వెనుకబడి ఉంది.'' అని అన్నారు.

''మహారాష్ట్రలో రైతాంగ పోరాటం ప్రభావం ఎక్కువగా కనిప్తోంది. వ్యవసాయ చట్టాల రద్దుతో పార్టీకి, కిసాన్‌ సభకు మంచి మద్దతు లభించింది. వ్యవసాయ సమస్యలపై ఉద్యమంతో ఎక్కువ మంది పనిచేస్తున్నారు. రైతాంగ పోరాట ఫలితంగా ఒక్క తాలూకాలోనే 54 వేల మంది కిసాన్‌ సభ సభ్యులు అయ్యారు.'' అని ఉదయ్  నార్కర్‌ చెప్పారు.


లౌకిక రాజ్యాన్ని కాపాడాలి   : సీతారాం ఏచూరి
ఏప్రిల్‌ 6 నుంచి 10 వరకు కన్నూర్‌లో జరగనున్న సీపీఎం 23వ మహాసభలు అత్యంత ప్రాధాన్యతను సంతరించుకున్నాయి. ఈ సందర్భంగా పార్టీ ప్రధాన కార్యదర్శి దేశాభిమాని ప్రతినిధితో మాట్లాడారు. ఆ వివరాలు ఆయన మాటల్లోనే ...

'' దేశం, ప్రజలు ఎదుర్కొంటున్న సవాళ్లను అధిగమించడానికి అవసరమైన కార్యాచరణ ప్రణాళికకు విధాన విధానాన్ని నిర్ణయించడం ఈ మహాసభ ప్రధాన ఎజెండా. దేశం బహుముఖ సవాళ్లను ఎదుర్కొంటోంది. లౌకిక, ప్రజాస్వామ్య గణతంత్రాన్ని ఫాసిస్ట్‌ హిందూ దేశంగా మార్చేందుకు బిజెపి ప్రభుత్వం చేస్తున్న ప్రయత్నాలే ఇందుకు కారణం. రాజ్యాంగ వ్యవస్థపై దాడులు పెరిగాయి. భారత సమాఖ్య స్వరూపాన్ని మార్చేందుకు ప్రయత్నిస్తున్నారు. పౌర స్వేచ్ఛ, ప్రజాస్వామ్య హక్కులను నిరాకరిస్తున్నారు. ప్రభుత్వరంగ ఆస్తులను అమ్ముతున్నారు. బీజేపీని ఓడించి ఒంటరి చేయడమే ప్రస్తుత లక్ష్యం. పార్టీ ముసాయిదా రాజకీయ తీర్మానాన్ని రెండు నెలల క్రితమే ప్రజల్లో విడుదల చేశాం. దానిపై పార్టీ సభ్యులు, వామపక్ష మద్దతుదారులు పెద్ద సంఖ్యలో చర్చించి, తమ అభిప్రాయాలను తెలిపారు.

అధికార వర్గ రాజకీయ పార్టీలు (ముఖ్యంగా కాంగ్రెస్‌) బీజేపీని ఎదుర్కోవడంలో ఘోర పరాజయాన్ని చవిచూశాయి. కాంగ్రెస్‌ బలహీనపడుతోంది. ఈ సందర్భంలో, లౌకిక, ప్రజాస్వామిక గణతంత్రాన్ని రక్షించే ప్రధాన బాధ్యత, కర్తవ్యం వామపక్ష పార్టీలపై ఉంది. ఇందుకోసం సీపీఎం స్వతంత్ర బలం, ప్రభావం మరింత పెరగాలి. వామపక్షాల స్వతంత్ర బలం పెరగాలి. ప్రత్యామ్నాయ కార్యక్రమాన్ని ఎత్తిచూపుతూ ఐక్యంగా ఆందోళనలు నిర్వహించాలి. సీపీఎంని దేశవ్యాప్తంగా ప్రభావవంతమైన పార్టీగా అభివృద్ధి చేయాలి.

బెంగాల్‌, త్రిపురలలో వామపక్షాలు, సీపీఎంపై ప్రణాళికాబద్ధంగా దాడులు జరుగుతున్నాయి. బెంగాల్‌లో తృణమూల్‌ క్రూరమైన దాడులు నిర్వహించి, 300 మందికి పైగా సిపిఎం కార్యకర్తలను హత్య చేసింది. ఆ దాడి ఇంకా కొనసాగుతూనే ఉంది. విద్యార్థి నాయకుడు అనీస్‌ ఖాన్‌ హత్య, వీర్‌భూమ్‌ హత్యాకాండ వంటివి ఉదాహరణలు. త్రిపురలో వామపక్షాలను తుడిచిపెట్టే లక్ష్యంతో బీజేపీ-ఆర్‌ఎస్‌ఎస్‌ దాడులు జరుగుతున్నాయి. వామపక్షాలను నిర్వీర్యం చేయాలన్న వారి పథకం ఫలించడం లేదు. బెంగాల్‌లో కాంగ్రెస్‌ సెమీ ఫాసిస్ట్‌ పాలనను తట్టుకుని లెఫ్ట్‌ ఫ్రంట్‌, సీపీఎం బలపడ్డాయి.

ప్రజల ఆర్థిక కష్టాలు, నిరుద్యోగం, కోవిడ్‌ ఇబ్బందుల మధ్య ఉత్తరప్రదేశ్‌తో సహా మూడు రాష్ట్రాల్లో బిజెపి విజయం సాధించింది. రోజువారీ జీవన సమస్యల కంటే మత గుర్తింపు ముఖ్యమన్న అభిప్రాయాన్ని బీజేపీ ప్రచారం కల్పించగలిగింది. ఇది ప్రమాదకర పరిస్థితి. ఇది ఫాసిస్ట్‌ ఎజెండాకు కచ్చితమైన ఉదాహరణ.''