న్యూఢిల్లీ : ఒడిషాలో గత నెలలో జరిగిన రైలు దుర్ఘటనకు గల కారణాలను విచారణ కమిటీ వెల్లడించింది. రాంగ్‌ సిగలింగ్‌ వల్లే ఈ ఘోర రైలు ప్రమాదం చోటుచేసుకుందని తేల్చింది. దీంతోపాటు అనేక స్థాయిల్లో లోపాలు ఉన్నట్టు గుర్తించిన రైల్వే సేఫ్టీ కమిషన్‌.. తన దర్యాప్తు నివేదికను రైల్వే బోర్డుకు సమర్పించింది. గతంలో ఇదే తరహాలో జరిగిన పొరపాట్ల నుంచి పాఠాలు నేర్చుకొని ఉంటే ఈ రైలు ప్రమాదం తప్పేదని అభిప్రాయపడింది. రాంగ్‌ వైరింగ్‌, రాంగ్‌ కేబుల్‌ వల్ల 2022 మే 16న ఇదే తరహా దుర్ఘటన ఖరగ్‌పూర్‌ డివిజన్‌లో చోటుచేసుకుందని నివేదిక తెలిపింది. అప్పుడే దాన్ని సరిచేసే చర్యలు చేపట్టి రాంగ్‌ వైరింగ్‌ సమస్యను పరిష్కరించిఉంటే ఒడిశాలోని బహనాగా బజార్‌ వద్ద ఈ రైలు దుర్ఘటన చోటుచేసుకొని ఉండేది కాదని తెలిపింది. సిగలింగ్‌, సర్క్యూట్‌ మార్పులో లోపాలే ఈ ప్రమాదానికి కారణమని తేల్చింది. ఒడిషాలోని బాలేశ్వర్‌లో జూన్‌ 2న రాత్రి కోరమాండల్‌ ఎక్స్‌ప్రెస్‌ సహా మూడు రైళ్లు అనూహ్య రీతిలో ఢీకొన్న ఘటన దేశ వ్యాప్తంగా పెను విషాదం నింపిన సంగతి తెలిసిందే. రైలు దుర్ఘటనలో 292మంది ప్రాణాలు కోల్పోగా 1000 మందికి పైగా గాయపడ్డారు. యావత్‌ దేశాన్ని తీవ్ర దిగ్భ్రాంతికి గురిచేసిన ఈ ఘటనపై కుట్ర కోణం ఆరోపణలు రావడంతో రైల్వే బోర్డు సిఫారసు మేరకు రంగంలోకి దిగిన కేంద్ర దర్యాప్తు సంస్థ దర్యాప్తు కొనసాగిస్తోంది. అయితే, తొలుత రైల్వే సేఫ్టీ కమిషన్‌ విచారణ జరపడంతో ఆ కమిటీ విచారణను పూర్తి చేసి నివేదికను రైల్వే బోర్డుకు తాజాగా సమర్పించింది.
