చిత్ర పరిశ్రమపై ఆశలు పెట్టుకొని చాలా మంది హీరోయిన్స్‌ వస్తారు. అలా వచ్చిన వారిలో కొందరికి వెంటనే అవకాశాలు దక్కుతాయి. మరి కొంతమందికి రెండు, మూడేళ్లు ప్రయత్నాలు చేయాల్సి వస్తుంది. ఈ క్రమంలో కొంతమంది ముందు మోడలింగ్‌ రంగంలో అడుగుపెట్టి.. కాస్త దర్శక, నిర్మాతల దృష్టిని ఆకర్షించి, అవకాశాలను అందుకుంటారు. అయితే ఇక్కడ సక్సెస్‌ ఎప్పుడు ఎవరి కెరీర్‌కి ఎలా ఉపయోగపడుతుందో చెప్పలేం. కొందరికి మొదటి సినిమాకే హిట్‌ అందుకుంటే.. మరికొందరికి కాస్త సమయం పట్టొచ్చు.. అలాంటి నటుల్లో ఒకరు దివ్యాన్ష కౌశిక్‌. తాను అనుకున్న రంగంలో నిలదొక్కుకోడానికి ప్రయత్నాలు చేస్తూనే ఉన్నారు.. తాజాగా విడుదలైన 'రామారావు ఆన్‌డ్యూటీ' సినిమాలో దివ్యాన్ష ఓ హీరోయిన్‌గా నటించారు. ఈ అవకాశంతో వరుస ఆఫర్లకు ఓకే చెప్పేశారు.. వాటిలో ఒకటి పాన్‌ ఇండియా సినిమా కావడం విశేషం.. ఈ నేపథ్యంలో ఆమె గురించిన కొన్ని విశేషాలు..
సినిమాల్లో రాణించాలని.. స్టార్‌ ఇమేజ్‌ను సొంతం చేసుకోవాలని.. ఫిల్మ్‌ ఇండిస్టీకి వచ్చే అమ్మాయిలు ఎందరో..! వారిలో నార్త్‌ టూ సౌత్‌ బాట పట్టి.. అవకాశాల కోసం పరితపించే అప్‌కమింగ్‌ స్టార్లు, మోడళ్లు ఇంకెందరో..! అలాంటివారిలో దివ్యాన్ష కౌశిక్‌ కూడా ఒకరు. ఉత్తరాఖండ్‌, ముస్సోరిలో పుట్టిన దివ్యాన్ష మొదట మోడలింగ్‌ రంగంలో తనకంటూ ఇమేజ్‌ను క్రియేట్‌ చేసుకున్నారు. కమర్షియల్‌ యాడ్స్‌ చేశారు. ఫ్యాషన్‌ వీక్‌లో ర్యాంప్‌ వాక్‌ చేశారు. ఇక అక్కడి నుంచి నేరుగా.. టాలీవుడ్‌లో హీరోయిన్‌గా అడుగుపెట్టారు. శివ దర్శకత్వంలో అక్కినేని నాగచైతన్య హీరోగా నటించిన మజిలీ సినిమాతో టాలీవుడ్‌ ఎంట్రీ ఇచ్చారు. అందులో అన్షు పాత్రలో మొదటి సినిమాతోనే కుర్రకారు హృదయాలను దోచుకున్నారు. ఈ చిత్రం అద్భుతమైన రివ్యూలతో పాటు బాక్సాఫీస్‌ వద్ద మంచి వసూళ్లు రాబట్టింది. దివ్యాన్ష కౌశిక్‌ నటనా నైపుణ్యానికి చాలా ప్రశంసలు అందాయి. తరువాత సిద్ధార్థ్‌ నటించిన 'టక్కర్‌' సినిమాతో తమిళంలో అరంగేట్రం చేశారు. ప్రస్తుతం 'రామారావు ఆన్‌ డ్యూటీ'తో తెలుగు సినిమాకు రీ ఎంట్రీ ఇచ్చారు. ఈ సందర్భంగా ఓ ఇంటర్వ్యూలో ఆమె పలు ఆసక్తికర విషయాలు పంచుకున్నారు.
పాత్ర నచ్చడంతో...
'కోవిడ్‌ తగ్గుముఖం పట్టాక నా ఇన్‌స్టాగ్రామ్‌లో చీరకట్టులో కొన్ని ఫొటోలు పోస్ట్‌ చేశా. దర్శకుడు శరత్‌కు అవి నచ్చి 'రామారావు ఆన్‌ డ్యూటీ' గురించి చెప్పారు. కథ, నా పాత్ర బాగా నచ్చడంతో సినిమా చేస్తానని చెప్పా. ఇందులో నేను నందిని అనే పాత్రలో కనిపిస్తా. ఒక భార్యగా, తల్లిగా హోమ్లీగా ఉంటా. చాలా పరిణతి ఉన్న పాత్ర. నటనకు ఆస్కారముంది. అయితే 'మజిలీ' సినిమా తర్వాత ఓ హిందీ ప్రాజెక్ట్‌ చేశా. కోవిడ్‌ పరిస్థితుల వల్ల అందరితో పాటూ నాకూ గ్యాప్‌ వచ్చింది. ఈ విరామంలో డ్యాన్స్‌, తెలుగు క్లాస్‌లు తీసుకున్నా. నన్ను నేను మలచుకోవడానికి వర్కవుట్స్‌ చేశా.' అని చెప్పారు.
సంతృప్తినిచ్చిన పాత్ర..
నటిగా వైవిధ్యభరితమైన పాత్రలు చేయాలని ఉంటుంది. ఈ సినిమాలో అలాంటి బలమైన పాత్రే దక్కింది. 'మజిలీ'లో చేసిన బబ్లీ గర్ల్‌ తరహా పాత్రలు చేయడం సులువు. ఈ పాత్ర చేయడం ఓ సవాల్‌. అందుకే నటిగా నాకెంతో సంతృప్తినిచ్చింది. ఇందులో సొంతంగా డబ్బింగ్‌ చెప్పుకోలేకపోయినా తదుపరి తెలుగు చిత్రంలో సొంత గొంతు వినిపిస్తా. అయితే మొదట్లో రవితేజను కలిసినప్పుడు కొంచెం భయంగా అనిపించింది. ఒక్కసారి పలకరించగానే 'ముంబయా? దిల్లీనా?' అంటూ హిందీలో హుషారుగా అడిగారు. దాంతో నాలోని భయం ఒక్కసారిగా ఎగిరిపోయింది. ఆయనలో గొప్ప ఎనర్జీ ఉంది. ఒత్తిడి లేకుండా గడపడం ఆయన నుంచే నేర్చుకున్నా అని చెప్పుకొచ్చారు.
దర్శకుడి విజన్‌ను నమ్ముతా..
'నటిగా అన్నిరకాల పాత్రలూ చేయగలనన్న నమ్మకం ఉంది. అవకాశమొస్తే ఎవరైనా జీవితకథల్లో నటించడానికైనా సిద్ధమే. నేనెక్కువగా దర్శకుడి విజన్‌ను నమ్ముతా. లక్కీగా ఇప్పటివరకూ మంచి విజన్‌, క్లారిటీ ఉన్న దర్శకులతోనే పనిచేశా. ప్రస్తుతం తెలుగులో హీరో సందీప్‌ కిషన్‌ - పాన్‌ ఇండియా స్టార్‌ విజరు సేతుపతి కీలక పాత్రలో నటిస్తున్న 'మైఖేల్‌' చిత్రంలో నటిస్తున్నా. తెలుగుతో పాటు తమిళం సహా ఇతర అన్ని దక్షిణాది భాషల్లోనూ అలాగే హిందీలోనూ విడుదల చేయబోతున్నారు. ఇదికాక సుధీర్‌వర్మ దర్శకత్వంలో ఓ సినిమా చేస్తున్నా. మంచి కథ దొరికితే వెబ్‌సిరీస్‌ చేయడానికీ సిద్ధమే!' అని చెప్పారు. కాగా కేవలం తెలుగు చిత్రాలు మాత్రమే కాకుండా తమిళ చిత్రాల అవకాశాలు కూడా దివ్యాన్షను వెతుక్కుంటూ వస్తున్నాయి.
పేరు : దివ్యాన్ష కౌశిక్‌
ఇతర పేర్లు : దివా
పుట్టిన తేదీ : ఫిబ్రవరి 10, 1997
పుట్టిన ప్రాంతం : ముస్సోరి, ఉత్తరాఖండ్‌.
నివాస ప్రాంతం : ముంబై
చదువు : గ్రాడ్యుయేషన్‌
హాబీస్‌ : ట్రావెలింగ్‌, షాపింగ్‌, రీడింగ్‌
తల్లిదండ్రులు : అశ్విని కౌశిక్‌, అంజు కౌశిక్‌
తోబుట్టువులు : గరీమా కౌశిక్‌
